Qyzylorda oblysynyń ákimi Qyrymbek Kósherbaev munai jáne gaz ónerkásibi qyzmetkerlerin kásibi merekelerimen quttyqtady.
Oblys ákimi aimaqtyń áleýmettik-ekonomikalyq damýynyń negizin munai quraityndyqtan, bul merekeniń erekshe ekenin atap ótti.
«Táýelsiz Qazaqstannyń 25 jylynda munai-gaz salasy Elbasy qoldaýynyń arqasynda el ekonomikasynyń kóshbasynda tur. Memleket basshysynyń tikelei yqpalymen «Shevron», «Ekson Mobil», «Konoko Filips», «Adjip», «British gaz», CNPC, «Mittall investment» jáne basqa da kompaniialarmen yntymaqtastyq ornatyldy. Aimaqta munai ónerkásibin damytýdyń bastamasy Qumkól ken ornynyń ashylýy boldy. Sońǵy 30 jylda munai men gaz klasteri, sonyń ishinde munaidy, ilespe gazdy jáne kondensatty óndirýdi ǵana emes, sondai-aq, munai óńdeitin zaýyttardy, munai ónimderin shyǵaratyn kásiporyndardy da qalyptastyrdy»,-dedi aimaq basshysy.
Sonymen qatar, qazirgi ýaqytta munai óndirý kólemi tómendeýde, aimaqtyń kóptegen ken oryndarynyń damýy artta qalýda. Qazirgi jaǵdaida otandyq munai óndirýdiń negizgi qory óndirilýi qiyn qorlar bolyp tabylatynyn atap ótti oblys ákimi.
Munai óndiretin kásiporyndardyń aldynda turǵan negizgi mindet – igeriletin ónimdik qabattardan munai alý múmkindigin barynsha arttyrý. Bul óndirilgen shikizat kólemin ulǵaitýǵa baǵyttalǵan zamanaýi qurylǵylar men eń ozyq tehnologiialardy qoldaný arqyly júzege asyrylady.
«Aimaqtyń ekonomikasyn ártaraptandyrý maqsatynda metallýrgiia, kólik logistikasy, agroónerkásip kesheni, shaǵyn biznes jáne týrizm salalaryn damytýdamyz. Sońǵy 5 jylda óńdeý ónerkásibindegi ónim 65% -ǵa, respýblika boiynsha - 9,1% -ǵa ósti. Shikizattyq emes eksport kólemi 2017 jyly 68% -ǵa ósti, al jalpy óńirlik ónim qurylymynda óndiris úlesi 5 jylda 2 esege artty», - dedi aimaq basshysy.
Sondai-aq, aimaqtyń munai salasynyń qyzmetkerlerin QR Energetika ministriniń birinshi orynbasary Mahambet Dosmuhambetov pen «QazMunaiGaz» UK AQ Basqarma tóraǵasynyń orynbasary Qurmanǵazy Esqaziev quttyqtady.
Aimaqtaǵy munai-gaz salasynyń úzdik qyzmetkerleri marapattalyp, is-shara merekelik-kontserttik baǵdarlamamen jalǵasty.
