Qyzylordada sáýir aiynda mánerlep syrǵanaýdan belgili sportshy Elizabet Tursynbaevanyń júldesine arnalǵan respýblikalyq jarys ótedi, dep habarlaidy "Ult aqparat".
Bul jaǵymdy jańalyq oblystyq konki sporty federatsiiasynyń kezekten tys otyrysynda belgili boldy. Oǵan Elizabettiń ákesi Baitaq Tursynbaev ta qatysty.
Elizabet Tursynbaeva 2000 jyldyń 14 aqpanynda Resei astanasy - Máskeý qalasynda dúniege kelgen. Onyń ákesi - Baitaq Tursynbaev Qyzylorda oblysynyń týmasy. Elizabet elimizdegi jarystarda Syr óńiriniń atynan shyǵady.
Osydan onshaqty jyldai buryn Máskeýdegi «Moskvich» eksprimenttik joǵary sport sheberligi mektebinde tálim aldy. Sondai-aq, Elizabet Almaty qalasynyń daryndy balalarǵa arnalǵan mektep-internaty men Máskeýdegi ortalyq áskeri-sporttyq klýbynda jattyqqan. 2012 jyly atalmysh qaladaǵy №37 balalar men jasóspirimder olimpiadalyq rezervter mektebinde sheberligin jetildirdi.
Elizabet 2018 jyly tuńǵysh ret eresekter arasyndaǵy qysqy Olimpiada oiyndarynda baq synady. Onda jekelei synda Elizabet Tursynbaeva jalpy esepte 12-oryn aldy. 2019 jyly álem chempionatynda kúmis júldeger boldy. Sol jyly qysqy ýniversiadada da sol jetistigin qaitalady.
Ol reseilik maman Eteri Týtberidzemen 2012-2013 jyldarda da jattyqqan edi. Odan keiingi bes jylda kanadalyq maman Braian Orserden tálim aldy. Elizabet byltyrdan bastap qaitadan Eteri Týtberidzeden tálim ala bastady.
