Qyzylorda ortalyǵynda kazino ashqan qala turǵynynyń 6 ai merzimge bas bostandyǵy shekteldi, dep habarlaidy "Ult aqparat" Qarjy monitoringi komitetiniń baspasóz qyzmetine silteme jasap.
Komitettiń Qyzylorda oblysy boiynsha ekonomikalyq tergeý departamenti qyzmetkerleri 2020 jyldyń tamyz aiynda qalanyń ortalyq kóshesiniń birinde zańsyz oiyn ornyn anyqtaǵan bolatyn.
«29 jastaǵy azamat kópqabatty turǵyn úidiń birinshi qabatynan jalǵa alǵan orynnan internet kazino keńsesin ashyp, 13 kompiýterdi ǵalamtor jelisi arqyly bás tigip oinaityn qumar oiyndar baǵdarlamasyna qosqan. Oiyn zalyna kúnine 5 000 teńge jalaqymen kassirler men kúzetshi jaldaǵan. Zańsyz oiyn oryny áshkerelenip, barlyq aiqaq usynylǵandyqtan uiymdastyrýshy kinásin tolyǵymen moiyndady», delingen habarlamada.
Qyzylorda qalalyq №2 soty zańsyz oiyn ornyn uiymdastyrýshyny Qylmystyq kodekstiń 307-baby 1-bóligimen kináli dep tanyp, 6 ai merzimge bas bostandyǵyn shekteý jazasyn taǵaiyndady. Osynsha merzimge probatsiialyq baqylaý jáne 100 saǵattyq májbúrli eńbekke tartý belgilendi.
2020 jyly Qyzylordada atalmysh departament zańsyz oiyn biznesine qatysty 9 qylmystyq quqyq buzýshylyq deregin tergedi. Nátijesinde 8 oiyn mekemesi jabylyp, 116 monitor, 109 protsessor, 43 televizor, 8 kassa apparaty, 31 terminal, 13 beinejazǵysh jáne 11,2 mln teńge tárkilendi.
