Qyzylorda oblysynda otbasylyq toi ótkizgen eki nysan anyqtaldy, dep habarlaidy "Ult aqparat".
Eki oqiǵa da Qyzylorda qalasynda tirkeldi. Qala ákimdiginiń janynan qurylǵan monitoringtik top qala aýmaǵyndaǵy meiramhana, dámhana, kafe sekildi qoǵamdyq tamaqtaný nysandary aralap, onda karantin talaptaryn saqtaý talabyn qadaǵalaidy. Bul maqsatta tiisti túsindirme jumystary turaqty júrgiziledi.
«Monitoringtik top músheleri 2-4 sáýir aralyǵynda karantin talabyn buzyp, 2 otbasylyq toi ótkizgen nysandardy anyqtady. Olardy toqtatyp, kemshilikke jol bergender jazaǵa tartyldy. Bul jumystar aldaǵy ýaqytta da turaqty jalǵasady. Epidemiologiialyq jaǵdaidy turaqtandyrý úshin Qyzylorda qalasynda otbasylyq, saltanatty, estelik is-sharalardy (banketter, úilený toilary, mereitoilar), onyń ishinde úide jáne adamdar kóp jinalatyn ózge de is-sharalardy ótkizýge tyiym salynǵan. Maska rejimi jáne áleýmettik qashyqtyq saqtaý - sanitarlyq talap, ári azamattardyń qazirgi ómirindegi kúndelikti erejege ainalýy tiis», - dep málim etti Qyzylorda qalasy ákimdiginen.
Esterińizge sala ketelik, budan buryn Qyzylordada karantin talaptaryn buzǵan 2 dámhananyń jumysy toqtatyldy.
