Adam quqyqtary jónindegi ýákil Elvira Ázimova Qyzylorda oblysyndaǵy qamaýda bolǵan analardyń jaǵdaiy týraly málimet berdi, dep habarlaidy QazAqparat.
«Jappai tártipsizdikterge deiin beibit mitingilerdiń bolǵany týraly memlekettik deńgeide tanylǵan faktini eskere otyryp, barlyq protsestik talqylaýlardy tolyqtyrý kerek. Osyǵan bailanysty Bas Prokýratýraǵa jergilikti aýmaqtardaǵy arnaiy jáne tergeý prokýrorlaryna, ásirese Atyraý, Shyǵys Qazaqstan, Qyzylorda jáne Aqmola oblystaryna qatysty tiisti sharalar qabyldaýdy tapsyrýdy suraimyn. Prokýrorlar tekserýdi kúsheitý týraly talap tergeý men qamaýǵa alynǵandardyń meditsinaǵa qoljetimdiligine de qatysty», - dedi ol «Habar-24» telearnasynda ótken brifingide.
Onyń aitýyna qaraǵanda, byltyr bul máseleni sheshýge úlken qadam jasalyp, jyl sońynda meditsinalyq qamtamasyz etý máselesi Ishki ister ministrliginen azamattyq Densaýlyq saqtaý ministrliginiń quzyryna berilgen bolatyn.
«Biraq zań tolyq iske asýy úshin jarty jyl ótý kerek. Jarty jyldyń ishinde biraz sharalar jasalý kerek. Barlyq qamaýdaǵy azamattar emdelýge qol jetkizýi tiis. Bul tek qana Ulttyq zańnamanyń talaby emes. Sonymen birge BUU talaby», - degen Elvira Ázimova ásirese, jaraqat alǵan, sozylmaly aýrýy bar adamdar men jas balalary bar áielderge qatysty bultartpaý sharalaryn jeńildetý kerek dep esepteitinin jetkizdi.
«Mysaly, Qyzylorda qalasynyń tergeý izoliatorynda eki áiel bolǵan. Olardyń bireýi bala emizý kezeńinde, ekinshisi 4 jastaǵy balasy bolǵan. Bizdiń ótinishimizge súienip, prokýratýra bultartpaý sharasyn ózgertti. Atalǵan áielder qazirgi ýaqytta úiinde, balalarynyń qasynda. Osyǵan bailanysty men qazir biraz qoǵamdyq uiymdarmen birge jumys istep jatyrmyn», - degen Elvira Ázimova atalmysh uiym ókilderine alǵys bildirdi.
