2018 jyldyń 7 aiynda Qyzylorda oblysynda jol-kólik oqiǵalarynyń sany 7 paiyzǵa, jol-kólik apatynan zardap shekkenderdiń sany 9 paiyzǵa azaidy. Bul týraly quqyqbuzýshylyqtardyń aldyn alý jónindegi vedomstvoaralyq komissiianyń otyrysynda málimdedi.
Vedomstvoaralyq komissiianyń otyrysynda jol qozǵalysy qaýipsizdigin qamtamasyz etý, mal urlyǵynyń aldyn alý men mal urlyǵymen kúresý máseleleri qarastyryldy.
Jol-kólik oqiǵalarynyń aldyn-alý sharalarynyń mańyzdylyǵyn eskere otyryp, bul másele únemi vedomstvoaralyq komissiianyń baqylaýynda bolady. Resmi málimetterge sáikes, Qazaqstanda sońǵy 10 jyl ishinde 162 myńnan astam jol-kólik oqiǵasy tirkeldi, onda 27 myńnan astam adam qaza bolyp, 211 myńnan astam adam jaraqat aldy.
«Aǵymdaǵy jyldyń 7 aiynda aimaqta jol-kólik oqiǵalary kezinde zardap shekkenderdiń sany 9 paiyzǵa, jazataiym oqiǵalardyń sany 25 paiyzǵa azaiǵan. Degenmen, jalpy oń dinamikaǵa qaramastan, keibir óńirlerde jáne eldimekenderde jazataiym oqiǵalar sany artyp otyr», - dedi aimaq basshysy.
Osyǵan bailanysty oblys ákimi jergilikti politsiia qyzmetine oblystyń eldimekenderindegi jazataiym oqiǵalardyń sebepterin anyqtap taldaýdy, joldy kesip ótý kezinde mektep oqýshylarynyń qaýipsizdigin qamtamasyz etý jumystaryn kúsheitýdi, júrgizýshiler men jaiaý júrginshilerdiń jol qozǵalysy erejelerin saqtaýy boiynsha vizýaldy jáne túsindirý jumystaryn júrgizýdi tapsyrdy.
Sonymen qatar, otyrysta mal urlyǵynyń aldyn alý jáne mal urlyǵymen kúres jónindegi sharalar qaraldy. Atqarylyp jatqan jumystar jaily Qyzylorda oblysy Ishki ister departamenti bastyǵynyń orynbasary Ǵani Tólebaev baiandady. Máselen, aǵymdaǵy jyldyń 7 aiy ishinde 297 urlyq deregi tirkelgen (2017 jyly - 379), iaǵni ótken jylmen salystyrǵanda qylmys deńgeii 21,6%-ǵa tómendedi, al qylmystardy anyqtaý deńgeii 28,6-dan 47,6% -ǵa, iaǵni 19 paiyzǵa deiin artty.
Aimaq basshysy atap ótkendei, bul másele alǵash ret 2015 jyldyń basynda komissiia otyrysynda qaralyp, sol kezden bastap urlyq sany jyl saiyn tómendeýde (2014 jyly - 783, 2015 jyly - 848, 2016 jyly - 667, 2017 jyly - 615, 2018 jyldyń 7 aiy - 297). Degenmen, qylmysqa qarsy kúres qarqynyn tómendetýge bolmaidy, dep atap ótti oblys basshysy.
«Mal urlaýdyń negizgi sebepteri - malǵa qadaǵalaýdyń jetispeýshiligi, qujattary tekserilmegen arzan et núkteleriniń bolýy jáne et satatyn saýda núktelerine baqylaýdyń joqtyǵy. Mal jaiylymyna jumyssyz aýyl turǵyndary tartylsa, urlyqtyń aldyn-alýǵa jáne qylmystardy azaitýǵa múmkindik beredi. Mysaly, N.Bekejanov aýyldyq okrýginde sońǵy 3-4 jyl ishinde mal urlyǵy týraly birde-bir derek tirkelmegen», - dedi Ǵani Tólebaev.
N.Bekejanov aýyldyq okrýginiń ákimi Faizýlla Erjanov mal jaiylymyn tiimdi uiymdastyra bilgeni úshin oblys ákiminiń alǵys hatymen marapattaldy, Erjanovtyń mal urlyǵyna qarsy kúrestegi tájiribesi basqa eldimekenderde qoldanylmaqshy.
