Qazaqstan Respýblikasynyń Prezidenti Nursultan Nazarbaevtyń bastamasymen Qazaqstan Respýblikasy Táýelsizdiginiń 25 jyldyǵyna orai 2016 jylǵy 13 jeltoqsanda "Raqymshylyq jasaý týraly" №27-VI zańy qabyldanǵan bolatyn, - dep habarlaidy "Ult aqparat" Qyzylorda oblystyq IID baspasóz qyzmetine silteme jasap.
Atalǵan zań boiynsha qylmystyq teris qylyqtar jáne onsha aýyr emes qylmystar jasaǵan adamdardy, aýyrlyǵy ortasha qylmystar úshin sottalǵan adamdardy, atap aitqanda kámeletke tolmaǵandardy, júkti áielderdi, kámeletke tolmaǵan balalary nemese múgedek balalary bar áielderdi, sondai-aq kámeletke tolmaǵan balalardyń jalǵyz ata-anasy bolyp tabylatyn er adamdardy, I, II jáne III toptardaǵy múgedekterdi, elý jastaǵy jáne ol jastan asqan áielderdi, alpys jastaǵy jáne ol jastan asqan er adamdardy, Uly Otan soǵysynyń qatysýshylary men múgedekteri jáne olarǵa teńestirilgen adamdardy, áskeri jáne (nemese) internatsionaldyq boryshyn oryndaý kezinde qaza tapqan áskeri qyzmetshilerdiń jesirlerin, sondai-aq kúieýleri soǵys múgedekteri jáne olarǵa teńestirilgen adamdar bolyp tabylatyn áielderdi qylmystyq jazadan bosatý kózdelgen.
Al, terroristik-ekstremistik baǵyttaǵy qylmystar jasaǵan, azaptaýlar jasaǵan, qaita qylmys jasaǵan, qylmystyq toptar quramynda qylmys jasaǵan jáne zańda kórsetilgen basqa da sanattaǵy qylmystar jasaǵan azamattarǵa raqymshylyq jasaý qoldanylmaidy.
Osy zań talaptaryn júzege asyrý maqsatynda Qyzylorda oblysy Ishki ister departamentinde jumys toby qurylyp, toqtatylýǵa jatatyn qylmystyq ister men teris qylyqtardyń tizimderi jasaqtaldy. Jalpy egemen elimizdiń tarihynda 10-shy ret qabyldanyp otyrǵan amnistiiaǵa Qyzylorda oblysy boiynsha 217 adam iligip, qylmystyq ister QR Qylmystyq-protsestik kodeksiniń 35-baby 1-bóligi 3-tarmaǵy negizinde óndiristen toqtatyldy.
Aita keteiik, atalǵan zań qoldanysqa engizilgen kúnnen bastap 6 ai ishinde júzege asyrylady jáne osy ýaqyt aralyǵynda ǵana qoldanysta bolady.
