Qyzylorda oblysynda koronavirýs juqtyrǵan adamdarmen qarym-qatynasta bolǵan 388 adam anyqtaldy. Onyń ishinde 101 adam juqtyrǵandarmen jaqyn qarym-qatynasta bolǵan, dep habarlaidy "Ult aqparat".
«Jalpy oblysymyzda koronavirýsqa qarsy statsionarlarda tósek oryndar daiyndalǵan. Qazirgi tańda 135 tósek orynǵa deiin keńeitildi. Sonymen qatar provizorlyq statsionar 100 tósek oryn bolsa, qazir 260 tósek orynǵa deiin keńeitildi. Karantindik qosymsha 600 tósek oryn bar», - dedi Qyzylorda oblysynyń densaýlyq saqtaý basqarmasynyń basshysy Jaqsylyq Ábdýsámetov «Habar 24» arnasynda tikelei efirden sóilegen sózinde.
Basqarma basshysy oblys aýmaǵyna syrttan kelgen azamattardyń bári de baqylaýǵa alynǵanyn aityp ótti.
«1A sanatyndaǵy elderden kelgen 33 azamat bar. Onyń 9-y aýrýhanada oqshaýlansa, 23-i úi jaǵdaiynda. 1V sanatynan kelgen 148 azamattyń 12-i aýrýhana, qalǵan 136-y úi jaǵdaiynda oqshaýlaýǵa alynǵan. Meditsinalyq uiymdardyń qyzmetkerleriniń bári qazirgi ýaqytta syrttan kelgen azamattardy anyqtaý jáne úide baqylaý jumystaryn júrgizýde. Juqpaly aýrýlardyń aldyn alý, taralýynyń qaýpin boldyrmaý maqsatynda aýyr naýqastarǵa jáne jalǵyzbasty analarǵa qatysty dári-dármekti úidi-úige taratý jumystary jolǵa qoiylǵan», - dedi ol.
Jaqsylyq Ábdýsámetov sondai-aq Qyzylorda oblysynda koronavirýs juqtyrǵan azamattarmen qarym-qatynasta bolǵan 388 adamnyń anyqtalǵanyn qosyp ótti.
«Onyń ishinde 101-i tyǵyz qarym-qatynasta bolǵan. Atalǵan azamattar úi karantininde. Aldynda anyqtalǵan 9 azamat em alyp jatyr. Qazirgi dinamikada jaǵdailarynyń nasharlaǵany baiqalmaidy. Osy naýqastardy emdeýge qajetti dári-dármek qory bar», - dedi ol.
Basqarma basshysy el ishinde toi-jiynǵa barmaý týraly nasihat jumystary júrgizilip jatqanyn jetkizdi.
«Bir úidiń azamattarynan jáne sol tóńirektegi kósheniń boiynda turatyn azamattardan osynsha naýqastyń tirkelýi – saqtaný sharalarynyń tolyq kólemde oryndalmaýynan bolyp otyrǵanyn atap ótkimiz keledi. Aldaǵy ýaqytta turǵyndardy oqshaýlaý máselesine mán berýge, indettiń taralýyna jol bermeýge shaqyramyz», - dedi ol.
