Qyzylorda oblysynyń Syrdariia aýdanynda tótenshe jaǵdai jariialandy. Bul óńirde ózen arnasynan asyp, eki jarym myń gektar aimaqty sý basyp qalǵan. Qutqarýshylar jarylǵan bógetti bitep úlgermei jatyr. Eger jolyn bógemese, irgesindegi Qaljanahýn aýyly da sý astynda qalýy múmkin.
Egis egýge erte bolsa da, Syr boiyndaǵy kúrishshiler amalsyzdan alqapqa túnep júr. Dalada as iship, birneshe kúnnen beri úi kórmegen. Óitkeni, dariianyń Alasiyr arnasyndaǵy bóget jarylǵan. Endi sharýalar shash etekten shyǵynǵa battyq dep otyr. Sý basqan egis alqabyn qurǵatý bylai tursyn, kóktemde ylǵaldy jerge tuqym sebýdiń ózi qiyn.
Baqytjan Kúshikbaev, sharýa qojalyǵynyń brigadiri:
- Qaptap shanamen tasyp jatyr. Qoldan kelgen jumysty istep jatyr. Sý alyp ketti. Oǵan qosa qanshama tehnika kerek. Ol pálenbai million aqsha.
Syrdariiadan tasyǵan sý egis alqaby men jailymdy basyp qaldy. Eger jarylǵan bóget shuǵyl bitelmese, irgede jatqan Qaljanahýyn aýylyn shaiyp ketýi múmkin eken.
Baqytjan Lekerov, Syrdariia aýdany ákiminiń orynbasary:
- Buzylǵan qorǵanys bógetterin qalpyna keltirgenimen dariiadaǵy sýdyń kólemi kúrt kóterilip, qaitadan 9 jerden dambany buzyp ketti. Kóktemge deiin bógetti qalpyna keltirmese sharýashylyqtyń túgeldei egis kólemin sý alyp ketip, Qaljan ahýn aýylyna qaýip tónýi múmkin.
Mamandar ózen boiyna qatqan muzdyń kesirnen sý arnasynan tasyǵanyn aitady. Eger aiazdyń beti qaitpasa, dariiadaǵy muzdy jarýǵa týra keledi.
Serik Sermaǵanbetov, Qyzylorda oblystyq jumyldyrý daiyndyǵy basqarmasynyń basshysy:
- Eger muz keptelisi paida bolyp, arnasynan sý shyǵyp ketip jatqan jaǵdaida biz muz jarý jumystaryn júrgizetin bolamyz.
Dál osyndai tótenshe jaǵdaidyń bolaryn sinoptikter aldyn ala eskerttik dep otyr. Biraq oǵan qyzylordalyq qutqarýshylar qulaq aspaǵan siiaqty.
Didar Jánibekuly: «Qazgidromet» ortalyǵy gidrologiia departamentiniń direktory:
- Buryn aqpanda sý tasqyny tirkelmeitin. Biraq ózender muz bolyp qatýyna bailanysty arnasynan asyp jatyr. Mundai jaǵdai Qyzylorda oblysynda tirkeldi. «Qazgidromet» Qyzylorda oblysy men ondaǵy tótenshe jaǵdailar departamentin aldyn ala eskertken bolatyn.
Qatqan muzdyń kesirinen jańa jyl qarsańynda ǵana ózen arnasynan tasyǵan edi. Ol kezde Qyzylordanyń irgesinde ornalasqan saiajaidaǵy úilerdi sý basty.
KTK
