Qyzylorda oblysynda 6 qańtardan bastap karantin talaptary jeńildetiledi, dep habarlaidy "Ult aqparat".
Qyzylorda oblysynyń Bas memlekettik sanitariialyq dárigeri Dinara Jańabergenovanyń jańa qaýlysy jariialandy.
Qaýlyda 6 qańtardan bastap azyq-túlik dúkenderi, shaǵyn marketter, sulýlyq salony, shashtaraz, sýpermarket, gipermarket, ashyq bazarlar, azyq-túlik emes dúkender, saýna, spa-ortalyq, monsha shtattyq rejimdegi ýaqyty boiynsha jumys jasaityn bolady. Dál osyndai jeńildik sporttyq-saýyqtyrý, saýda-oiyn-saýyq, balalar men eresekterdiń bilim berý, biznes ortalyqtary, kinoteatrǵa da jasalady.
2021 jylǵy №1 qaýlyǵa sáikes birqatar shekteý sharalary saqtalǵan. Ol kaliandy paidalanýǵa, oiyn-saýyq, sporttyq is-sharalardy, kórmelerdi, forýmdardy, konferentsiialardy ótkizý boiynsha saqtalady. Sondai-aq otbasylyq, saltanatty, estelik is-sharalardy, onyń ishinde úide jáne adamdar kóp jinalatyn ózge de is-sharalardy, býkmekerlik keńse, balalardy saýyqtyrý lagerleriniń qyzmetine, sportshylardyń ózge eldegi jarysqa qatysýyna da osyndai shekteý bolady.
Al jolaýshylar poezdaryna, ashyq aýadaǵy jattyǵýǵa, ulttyq qurama, klýb komandalarynyń sporttyq jattyǵýyna, qarjy uiymdaryna, kórermenderdiń qatysýynsyz, bir mezgilde 100 adamnan asyrmai respýblikalyq jarystardy ótkizýge, bir mezgilde 30 adamnan asyrmai, oblystyq komandalardy daiarlaý úshin oqý-jattyǵý jiyndaryn ótkizýge ruqsat beriledi.
«Oqý jylynyń úshinshi toqsanynan bastap, kontingenti 300 oqýshyǵa deiin qalalyq jáne aýyldyq mektepterde synyptardaǵy balalar sany 15 adamǵa deiin dástúrli formatta oqýǵa bolady. Sondai-aq, synyptardy 15 baladan asyrmai, ata-analardyń ótinishi boiynsha jalpy bilim beretin mektepterde 1-den 5 synypqa deiin qosa alǵanda, halyqaralyq mektepterde 7 synypqa deiin qosa alǵanda kezekshi synyptarda oqytýǵa, oqý bitiretin synyptar (9, 11 (12) synyptar) úshin aptanyń 6 kúni ishinde aralas oqytýǵa múmkikdik jasalady. Oǵan qosa pánderdiń 70%-yn shtattyq rejimde, 30%-yn qashyqtyqtan oqytýǵa, bilim berý mekemesi ákimshiliginiń sheshimi boiynsha sabaqtan tys ýaqytta 5 adamnan aspaityn toptarda oqýshylardy jeke oqytýǵa ruqsat berildi.Ekinshi semestrden bastap kolledjder men joǵary oqý oryndarynyń I kýrs stýdentteri úshin shtattyq oqytýǵa kóshedi», - dep atap kórsetilgen atalǵan qaýlyda.
Budan buryn 11 jeltoqsannan bastap Qyzylorda oblysynda karantin talaptary jeńildetilgen bolatyn.
