Qyzylorda oblysynda tirekti eldi-mekenderdi damytý jumysy 2013 jyly bastaldy. Oǵan sáikes keletin 16 eldi-meken iriktelip alyndy.
Sońǵy 3 jylda biýdjet kózderinen tirekti aýyldardaǵy áleýmettik nysandar qurylysyna, kúrdeli jóndeý, infraqurylymmen jabdyqtaý, abattandyrý sharalaryna 9137 mln teńge qarjy baǵyttaldy. Eldi mekenderdiń barlyǵy ortalyqtandyrylǵan aýyzsý júiesine qosylǵan. Uzyndyǵy 310,4 shaqyrym bolatyn aýylishilik joldardyń 64%-ne asfalt tóselgen. Elektr jelileriniń jalpy uzyndyǵy 515,5 shaqyrym bolsa, onyń ortasha tozý jaǵdaiy – 63%.
Barlyq tirek eldi mekende memlekettik 22 mektep, onyń ishinde mektepke deiingi bala tárbiesi jónindegi uiymdar qyzmet jasaidy. Balabaqsha sany – 29, onyń 16-sy - memlekettik, 13-i – jeke menshikte. Jańadan 3 mektep (Eńbekshi, Túgisken, Tómenaryq), 3 balabaqsha (Mádeniet, Eńbekshi, Túgisken) salyndy. 8 mektep (Sekseýilde – 3-eý, Shijaǵa, Mádeniet, Tómenaryq, Janqoja batyr, Túgisken), 7 balabaqsha (Órkendeý, Tóretam, Aqqum, Túgiskende – 2-eý, Tómenaryq, Birlik) ǵimarattary kúrdeli jóndeýden ótkizildi.
Qazirgi kúni atalǵan aýyldarda turǵyndarǵa 25 densaýlyq saqtaý uiymy qyzmet kórsetedi. 8 dárigerlik ambýlatoriia qurylysy, onyń ishinde 4 aýylda Shijaǵa, Órkendeý, Aqjarma, Birlik memlekettik-jekeshelik áriptestik negizinde salynyp jatyr. Sekseýil, Qamystybas, III Internatsional, Eńbekshi eldi mekenderinde biýdjet esebinen salyndy. 2 aýylda emhana men dárigerlik ambýlatoriiaǵa kúrdeli jóndeý júrgizildi.
Mádeniet salasynda 16 aýyldyq klýb jumys jasaidy. 4 aýylda (Sekseýil, Qamystybas, Mádeniet, Eńbekshi) mádeniet úileri salyndy. 5 aýylda (Janqoja batyr, Órkendeý, III internatsional, Aqjarma, Besaryq) klýbtar túgeldei jóndeldi. Sonymen qatar, 17 kitaphana (Sekseýil kentinde – 2-eý, qalǵan aýyldarda – 1-eýden) turǵyndarǵa qyzmet kórsetýde. Olardyń barlyǵy mádeniet úilerinde ornalasqan. Shijaǵa, Túgisken aýyldarynda mádeniet úiin salý qajettiligi týyndap otyr.
Kásipkerlikti damytý baǵytynda aýyldyq eldi mekenderdiń óndiristik áleýetin damytýǵa, ekonomikany kóterýge, qosymsha jumys oryndaryn qurýǵa yqpal etetin biznes qurylymdardyń belsendiligin arttyrý mańyzdy. Bul salada sońǵy 5 jylda jalpy somasy 716,5 mln teńgege 89 joba júzege asyryldy. «Biznestiń jol kartasy - 2020» baǵdarlamasy sheńberinde 2017 jyly 9 granttyq joba qarjylandyrylsa, 16 jumys orny ashyldy. Biyl 17 jobaǵa qarjy bólinip, 34 jumys orny quryldy. 2015-2018 jyldary «Óńirlik investitsiialyq ortalyǵy» JShS arqyly 6%-pen 5 jylǵa jalpy somasy 242,3 mln teńgege 49 joba qarjylandyrylyp, 63 jumys orny ashyldy. 8 tirekti eldi mekende 351 adamnan turatyn 12 aýyl sharýashylyǵy kooperativi quryldy. Mal jáne qus sharýashylyǵy baǵytyndaǵy 6 kooperativ nesielendirildi.
Osy jyldyń 1 qańtarynan bastap oblysta halyq sany 2 myń adamnan asatyn aýyl ákimderiniń biýdjeti 65 aýyldyq okrýgte engizildi. Derbes biýdjetti engizý aýyldyq okrýgterdiń qarjylyq múmkindikterin keńeitýge jáne salyqty tikelei óz biýdjetine alýy arqyly jergilikti mańyzy bar máselelerdi sheshýde jergilikti ózin-ózi basqarýdyń rólin kúsheitýge múmkindik beredi. Tirekti eldi mekender ishinen Qazaly aýdanynyń Janqoja batyr jáne Órkendeý aýyldaryndaǵy halyq sany 2 myńnan tómen bolǵandyqtan, derbes biýdjet engizilmei, olar aýdan biýdjetiniń quramynda qalyp otyr. 1 shildege deiin jergilikti ózin-ózi basqarýdyń 4-deńgeiine jatatyn aýyldyq okrýgterdiń biýdjet josparynyń 54,5%-i oryndaldy.
Tirekti eldi mekenderdi ári qarai damytý baǵytynda tiisti memlekettik organdarmen birlesip, olardy keshendi damytýdyń 2019-2021 jyldarǵa arnalǵan jol kartasy ázirlenip, jumys júrgiziledi.
