Qoljazbalar jáne sirek kitaptar ulttyq ortalyǵynyń mamandary Qyzylordaǵa issapar barysynda XVIII-XX ǵasyrlardaǵy qundy qoljazbalar men sirek kitaptardy tapty, dep habarlaidy "Ult aqparat" QR Mádeniet jáne aqparat ministrliginiń baspasóz qyzmetine silteme jasap.
Halyqtyń qolynda saqtalǵan 24 tarihi muranyń ishinde XVIII ǵasyrdyń sońynda jazylǵan Shariǵat týraly qoljazba, 1904 jáne 1912 jyldary Qazan baspasynda shyqqan Ahmet Iasaýidiń «Diýani hikmet» kitaby bar.
Ǵalymdar Quran men onyń túrki tilindegi túsiniktemesin, «Jami ar-Rýmýz», 1909-1910 jyldary Mysyr baspasynan shyqqan «Badai as-sanai fi tartib ash-Sharai» (Joldy retke keltirýdegi ǵajaiyp óner) kitaptaryn, 1898 jyly basylǵan «Sharh Kanz ad Dakaik» kitabynyń 6-shy tomyn, «Kanz ad dakaik» (Dáldiktiń qazynasy) jinaǵy jáne Tashkentte jaryq kórgen «Allaiar sopynyń hikmeti» men «Nur ál ǵashyqin» (Sopylyq) kitaptaryn tapty. Tarihi muralardyń barlyǵy Ulttyq ortalyqtyń qoryna tabys etildi.
Sondai-aq litografiialyq baspadan shyqqan, Qazanda basylǵan «Haftiiak Sharif», Tashkentte basylǵan «Óleńder», «Fikh» kitaby, «Ǵiias ál Lýga» (sózdik) jáne ózge de qundy qoljazbalar da ortalyqtyń qoryn tolyqtyrdy.
«Jazba dúnielerdiń barlyǵy jergilikti halyqtyń sandyǵynda, shatyrynda, saraiynda saqtalǵan. Kóne jazbalardyń jaǵdaiy óte nashar jáne restavratsiiany qajet etedi. Qazir restavratsiia-konservatsiialyq zerthanada kitaptarǵa dezinfektsiia men dizensektsiia jasalyp jatyr. Ári qarai qalpyna keltirý jumystary júrgizilip, kóshirmesi jasalady»,- dedi Ulttyq ortalyqtyń Ǵylymi-zertteý jumystaryn uiymdastyrý bóliminiń jetekshisi Kamshat Párimbekova.
Ǵalymdar toby memlekettik kitaphana, mýzei, arhiv mekemelerine de bardy. Ulttyq muralardy izdeý, zertteý jumystary ózge de óńirlerde jalǵasady.
