قولجازبالار جەنە سيرەك كٸتاپتار ۇلتتىق ورتالىعىنىڭ ماماندارى قىزىلورداعا ٸسساپار بارىسىندا XVIII-XX عاسىرلارداعى قۇندى قولجازبالار مەن سيرەك كٸتاپتاردى تاپتى, دەپ حابارلايدى "ۇلت اقپارات" قر مەدەنيەت جەنە اقپارات مينيسترلٸگٸنٸڭ باسپاسٶز قىزمەتٸنە سٸلتەمە جاساپ.
حالىقتىڭ قولىندا ساقتالعان 24 تاريحي مۇرانىڭ ٸشٸندە XVIII عاسىردىڭ سوڭىندا جازىلعان شاريعات تۋرالى قولجازبا, 1904 جەنە 1912 جىلدارى قازان باسپاسىندا شىققان احمەت ياساۋيدٸڭ «ديۋاني حيكمەت» كٸتابى بار.
عالىمدار قۇران مەن ونىڭ تٷركٸ تٸلٸندەگٸ تٷسٸنٸكتەمەسٸن, «جامي ار-رۋمۋز», 1909-1910 جىلدارى مىسىر باسپاسىنان شىققان «باداي اس-ساناي في تارتيب اش-شاراي» (جولدى رەتكە كەلتٸرۋدەگٸ عاجايىپ ٶنەر) كٸتاپتارىن, 1898 جىلى باسىلعان «شارح كانز اد داكايك» كٸتابىنىڭ 6-شى تومىن, «كانز اد داكايك» (دەلدٸكتٸڭ قازىناسى) جيناعى جەنە تاشكەنتتە جارىق كٶرگەن «اللايار سوپىنىڭ حيكمەتٸ» مەن «نۇر ەل عاشىقين» (سوپىلىق) كٸتاپتارىن تاپتى. تاريحي مۇرالاردىڭ بارلىعى ۇلتتىق ورتالىقتىڭ قورىنا تابىس ەتٸلدٸ.
سونداي-اق ليتوگرافييالىق باسپادان شىققان, قازاندا باسىلعان «حافتيياك شاريف», تاشكەنتتە باسىلعان «ٶلەڭدەر», «فيكھ» كٸتابى, «عيياس ەل لۋگا» (سٶزدٸك) جەنە ٶزگە دە قۇندى قولجازبالار دا ورتالىقتىڭ قورىن تولىقتىردى.
«جازبا دٷنيەلەردٸڭ بارلىعى جەرگٸلٸكتٸ حالىقتىڭ ساندىعىندا, شاتىرىندا, سارايىندا ساقتالعان. كٶنە جازبالاردىڭ جاعدايى ٶتە ناشار جەنە رەستاۆراتسييانى قاجەت ەتەدٸ. قازٸر رەستاۆراتسييا-كونسەرۆاتسييالىق زەرتحانادا كٸتاپتارعا دەزينفەكتسييا مەن ديزەنسەكتسييا جاسالىپ جاتىر. ەرٸ قاراي قالپىنا كەلتٸرۋ جۇمىستارى جٷرگٸزٸلٸپ, كٶشٸرمەسٸ جاسالادى»,- دەدٸ ۇلتتىق ورتالىقتىڭ عىلىمي-زەرتتەۋ جۇمىستارىن ۇيىمداستىرۋ بٶلٸمٸنٸڭ جەتەكشٸسٸ كامشات پەرٸمبەكوۆا.
عالىمدار توبى مەملەكەتتٸك كٸتاپحانا, مۋزەي, ارحيۆ مەكەمەلەرٸنە دە باردى. ۇلتتىق مۇرالاردى ٸزدەۋ, زەرتتەۋ جۇمىستارى ٶزگە دە ٶڭٸرلەردە جالعاسادى.
