Foto: Qyzylorda oblysy ákimdigi
Búgin oblys ákimi Nurlybek Nálibaev "Qazaqstan barysy-2022" týrniriniń jeńimpazy Maqsat Isaǵabylov pen "Altaidai jer qaida?" atty halyqaralyq aqyndar aitysynyń júldegeri, úsh dúrkin "Altyn dombyra" iegeri, aitys óneriniń aqbereni Muhtar Niiazovty qabyldady, - dep habarlaidy Tengrinews.kz.
Aimaq basshysy Syr sańlaqtaryn jáne Maqsattyń bapkeri, qazaq kúresinen oblystyń aǵa jattyqtyrýshysy Bolatbek Keneevti jeńisimen quttyqtap, qos aimaq jurtynyń riiasyz alǵysyn jetkizdi.
"Árbir júrek túbinde jańǵyrar alaý sezim, uly kúsh bolady. Ult danalyǵy "Er - namysynyń quly" dep beker aitpaǵan. Osy ulttyq namys bizdi jeńiske jeteleidi, qaharmandyqqa bastaidy. Búgingi baýyrlarymyzdy da osy qasiet ozdyrdy. Árine, ushqyr da utqyr uldarymyzdy qalai ulyqtasaq ta jarasymdy. Ózderińizge belgili, biylǵy jyldyń mamyr aiynda mádeniet pen sport salasy birigip, iri qurylymǵa ainaldy. Ol - birliktiń belgisi, onyń ereksheligi - egiz. Sózimniń dáleli, Maqsat pen Muhtardyń úilesimdi jeńisi", - dedi oblys ákimi.
Basqosý barysynda aimaq basshysy Maqsat Isaǵabylovqa 2 bólmeli páterdiń kiltin tabystap, Muhtar Niiazovqa aq boz at mingizdi.
Óz kezeginde qos sańlaq alǵaýsyz alǵysyn arnaǵan Syr jurtyna zor rizashylyǵyn bildirip, bairaqty básekeler men sóz alamanynda aimaqtyń júlde taiqazanyna olja salatynyn jetkizdi.
