Memleket basshysy aýyldardyń ósip-órkendeýi agrosektordyń ilgerileýine septigin tigizetinin aityp, Qyzylorda oblysyndaǵy sýarmaly jerlerdegi sý tapshylyǵyn joiý úshin jańa sý qoimalaryn salý qajettigin atap ótti, dep habarlaidy "Ult aqparat" Aqordaǵa silteme jasap.
Qasym-Jomart Toqaev Qyzylorda oblysynyń jurtshylyǵymen kezdesýinde osylai málim etti. Jiynǵa óńirdiń ziialy qaýym, ardagerler men jastar ókilderi, jergilikti atqarýshy organdardyń basshylary men BAQ ókilderi qatysty.
Memleket basshysy aimaqtardan túsip jatqan usynystardy eskere otyryp, óńirlerdi damytýǵa baǵyttalǵan arnaiy keshendi memlekettik baǵdarlamanyń iske qosylatynyn aitty. Sondai-aq, Qazaqstan Prezidenti osy maqsat-mindetterdi júzege asyrý úshin oblys basshylyǵy sheshýi tiis birqatar máselelerge toqtaldy.
– Aimaqtaǵy azamattardyń jalaqysyn ósirý – Úkimet pen oblysy ákiminiń basty mindeti! Laiyqty jalaqy tóleitin jańa jumys oryndaryn ashýǵa basa mán berý qajet. Bul baǵytta iri kásiporyndardyń qýatyn tiimdi paidalanýdy nazarǵa alý kerek, – dedi Qasym-Jomart Toqaev.
Memleket basshysy shetel kompaniialarynda jumys isteitin otandastarymyzdyń múddelerin qorǵaýdyń mańyzdylyǵyna nazar aýdardy. Sonymen qatar, oblystyń áleýmettik saladaǵy jetistikterine toqtaldy.
– Kóp balaly jáne turmysy tómen otbasylarǵa qoldaý kórsetý úshin oblysta Áleýmettik jol kartasy iske qosylǵan. Biyl «Aýyl – el besigi» baǵdarlamasynyń aiasynda bilim, densaýlyq saqtaý, mádeniet, jol qurylysy salalarynda quny 1,7 milliard teńge bolatyn 60 joba josparlanǵan. Oblys ákimine solardy ýaqtyly ári tiimdi júzege asyrýdy tapsyramyn, – dedi Qazaqstan Prezidenti.
Qasym-Jomart Toqaev damýdyń jańa draiverlerin qalyptastyrý qajet ekenin aityp, qýatty ekonomikaǵa qol jetkizýdiń mańyzdylyǵyn atap ótti.
– Indýstriialandyrý saiasaty óziniń jemisin berdi. Bul baǵyt odan ári jalǵasady. 2013 jyldan beri Qyzylorda oblysynda óńdeýshi ónerkásip salasy eki ese ósti. Iri tsement zaýyty iske qosyldy. «Shalqiia» ken ornynda qýatty kombinattyń qurylysy bastaldy. Budan bólek, oblystaǵy shyny zaýytynyń qurylysyn aiaqtaý qajet. «Báiterek» holdingi men oblys ákimdigine zaýytty iske qosyp, Qazaqstannyń alǵashqy shynysyn shyǵarýdy tapsyramyn, – dedi Qazaqstan Prezidenti.
Memleket basshysy aýyldardyń ósip-órkendeýi agrosektordyń ilgerileýine septigin tigizetinin aityp, Qyzylorda oblysynyń aýyl sharýashylyǵyndaǵy áleýeti áli tolyq paidalanylmai otyrǵanyna nazar aýdardy.
– Sýarmaly jerlerde sý tapshylyǵy bar. Sondyqtan, jańa sý qoimalaryn salý qajet. Úkimet oblys ákimdigimen birge atalǵan máseleni sheshý úshin maǵan naqty jumys josparyn usynsyn. Búkil el boiynsha aýyl infraqurylymyn jańǵyrtatyn kez keldi. Jergilikti joldardyń, sý qubyrlarynyń, elektr jelileriniń, mádeni-sport keshenderiniń bári jańarýy qajet, – dedi Qasym-Jomart Toqaev.
Qazaqstan Prezidenti óńirdegi ekologiialyq problemalarǵa, sonyń ishinde, Aral problemasyna, ainalasyna ziianyn tigizip otyrǵan munai-gaz jáne ýran qaldyqtaryna nazar aýdardy.
– Ekologiia – qyzylordalyqtardy tolǵandyratyn máseleniń biri. Halyq Aral taǵdyryna alańdaidy. Elbasynyń bastamasy boiynsha «Syrdariia arnasyn retteý jáne Aral teńiziniń soltústik bóligin saqtap qalý» jobasy iske asyrylýda. Osy jobanyń jáne Kókaral bógetiniń arqasynda Kishi Araldaǵy sý qalpyna keldi. Bul balyq sharýashylyǵyn jandandyrýǵa septigin tigizdi. Taǵy bir mańyzdy másele – búginde turǵyndardy munai-gaz ben ýrannyń ziiandy qaldyqtary alańdatyp otyr. Óńirdegi kásiporyndarǵa jańa tehnologiialar engizip, ekologiialyq qaýipsizdikti halyqaralyq standarttarǵa sai etý qajet, – dedi Memleket basshysy.
Qasym-Jomart Toqaev Baiqońyrdy Qazaqstannyń ǵarysh salasynyń negizi retinde atap ótip, bul keshen oblysqa joǵary tehnologiialardy damytýǵa múmkindik beretinin aitty.
– Bizdiń maqsat – ǵarysh tehnologiialaryn Otanymyzdyń, halqymyzdyń múddesi úshin qoldaný. Baiqońyr qalasynyń infraqurylymyn jańǵyrtý jumysy jalǵasýda. Munda 30 jyl ishinde alǵash ret kópqabatty úiler jáne meditsinalyq ortalyq salyndy. Bes mektep Qazaqstannyń bilim standartyna kóshti. Qazir álemde investorlar ǵarysh startaptaryna keń qoldaý kórsetýde. Biz de Baiqońyrdyń áleýetin tiimdi paidalanyp, bul úrdisten shet qalmaýymyz kerek, – dedi Qazaqstan Prezidenti.
Sondai-aq, Qyzylorda óńiriniń jurtshylyǵy atynan ardagerler, kásipkerler, muǵalimder, sportshylar sóz sóilep, ózderiniń usynys-tilekterin jetkizdi.
Sońynda Memleket basshysy xalyqtyń ál-aýqatyna qatysty máselelerdiń barlyǵy jeke óziniń baqylaýynda bolatynyn aityp, jiynǵa qatysýshylardy Qyzylorda ólkesin damýdyń jańa deńgeiine shyǵarý úshin atsalysýǵa shaqyrdy.
Qazaqstan Prezidenti elimizdiń áleýmettik-ekonomikalyq jáne mádeni damýyna qosqan úlesi úshin «Syr marjany» JShS direktory M.Óteevti, kópsalaly balalar aýrýhanasynyń dárigeri A.Shúlenbaevty, Qyzylorda qalalyq máslihatynyń depýtaty, Qyzylorda oblysynyń qurylysshylar qaýymdastyǵynyń jetekshisi Q.Ernazarovty, dańqty sportshy, mánerlep syrǵanaýdan halyqaralyq dárejedegi sport sheberi E.Tursynbaevany jáne «Nartai óner mektebi» kommýnaldyq memlekettik qazynalyq kásipornynyń direktory M.Bekpeiisovti alǵys hattarmen marapattady.
