Foto: Freepik
Jańaózende politseiler bopsalaý qylmysy boiynsha kúdikti eki er adamdy ustady. Tergeý nusqasyna sáikes, olardyń biri 24 jastaǵy qyzdy intimdik fotosýretterin taratamyn dep qorqytyp, 1 million teńge talap etken, dep habarlaidy Ult.kz Lada.kz basylymyna silteme jasap.
Quqyq qorǵaý organdarynyń málimetinshe, politsiiaǵa 2000 jyly týǵan jábirlenýshi aryzdanǵan. Onyń aitýynsha, 1997 jyly týǵan er adam intimdik fotosýretterdi áleýmettik jelilerde jáne týystary arasynda taratamyn dep qorqytyp, odan 1 million teńge kóleminde aqsha talap etken.
Tergeý materialdaryna sáikes, kúdikti WhatsApp arqyly aldymen 200 myń teńge aýdarýdy, al qalǵan 800 myń teńgeni 2026 jylǵy 20 qańtarǵa deiin tóleýdi talap etken. Aqshany kórsetilgen shotqa aýdarýdy suraǵan.
Jedel-izdestirý is-sharalarynyń nátijesinde 17 qańtar kúni Jańaózen qalasynda eki er adam ustaldy.
Tintý barysynda kúdiktilerdiń birinen kók tústi iPhone 14 Pro Max uialy telefony, ekinshisinen qara tústi iPhone 11 tárkilendi. Qurylǵylar zattai dálel retinde iske tirkeldi.
Atalǵan fakti boiynsha QR QK 194-babynyń 1-bóligi (Bopsalaý) boiynsha qylmystyq is qozǵaldy. Kúdiktiler ýaqytsha ustaý izoliatoryna qamaldy. Qazirgi ýaqytta sotqa deiingi tergeý júrgizilip jatyr.
Bopsalaýshylarǵa 4 000 AEK-ke deiin (17 300 000 teńge) aiyppul salý, sol mólsherde túzeý jumysy, 1 000 saǵatqa deiin qoǵamdyq jumystarǵa tartý, 4 jylǵa deiin bas bostandyǵyn shekteý nemese sol merzimge bas bostandyǵynan aiyrý jazasy, múlkin tárkileý nemese tárkilemeý qarastyrylǵan.
