QR DSM Taýarlar men qyzmetterdiń sapasy men qaýipsizdigin baqylaý komiteti Qytaimen shekaradaǵy ótkizý pýnktterinde sanitarlyq-karantindik baqylaýdy kúsheitti, - dep habarlaidy QR Densaýlyq saqtaý ministrligi.
Bul sharalar Qytaidyń Ýhan qalasyndaǵy koronavirýstyń órshýine bailanysty qolǵa alyndy. Virýs taralýynyń aldyn alý úshin ministrlik Qytaiǵa sapardan ýaqytsha bas tartýǵa keńes beredi.
«Altynkól temirjoly», «Nur joly», «Qorǵas» HShYO baqylaý-ótkizý beketterinde jáne Úrimji - Almaty poiyzdarynda aýrýdyń aldyn alý sharalary júrgizilýde.
Eske sala keteiik, «Qorǵas» HShYO 2020 jyldyń 2 aqpanyna deiin jabyq tur. Ótkizý beketteriniń Qytaidyń jańa jyl merekesin toilaýǵa bailanysty jabylǵan bolatyn.
Sonymen birge barlyq áýejailar men temirjol vokzaldarynda, avtomobil ótkelderinde, ásirese QHR-dan kelgen adamdarǵa (jolaýshylarǵa, tasymaldaýshylarǵa, ekipaj múshelerine, bortserikterge jáne basqalarǵa) mindetti termometriialyq tekserý júrgiziledi.
Qazirgi ýaqytta memlekettik shekaranyń ótkizý beketterinde QHR-dan kelgen 19 704 adam tekserýden ótti: Almaty jáne Nur-Sultan halyqaralyq áýejailarynda 17 043 adam, temirjol vokzalynda – 161 adam tekserildi. Olardyń arasynda dene qyzýy kóterilgen jáne syrqat belgileri bar jolaýshylar bolmady.
Aita keteiik, meditsinalyq uiymdarda qajetti dári-dármekter men meditsinalyq maqsattaǵy buiymdardyń tizimi jasaldy. Jergilikti densaýlyq saqtaý organdary juqpaly aýrýlar statsionarynyń patsientterdi qabyldaýǵa daiyndyǵyn jáne basqa aýrýhanalarǵa qosymsha tósek oryndarymen qamtamasyz etti. Sonymen birge, meditsinalyq qyzmetkerlerdiń teoriialyq jáne praktikalyq daiyndyǵy pysyqtaldy.
Áleýmettik meditsinalyq saqtandyrý qory negizinde 1406 jáne + 7 (7172) 76-80-43 Call-ortalyǵy ashyldy. Onda turǵyndar táýlik boiy qońyraý shalyp, álemdegi koronavirýstyq aýrý jaǵdaiy týraly qajetti aqparat pen aldyn alý sharalary týraly bile alady.
QR Densaýlyq saqtaý ministrligi atalǵan jaǵdaidy turaqty baqylaýyna aldy.
Eske salaiyq, keshe QR Prezidenti Qasym-Jomart Toqaev Qytaidan Qazaqstan aýmaǵyna koronavirýstyń taralýyna jol bermeý boiynsha naqty uiymdastyrý sharalaryn qabyldaýdy tapsyrǵan bolatyn.
Qazir Qytaida pnevmoniialyq infektsiianyń jańa túri tarap jatyr. Syrqatqa shaldyqqan jáne kóz jumǵandar sany kún sanap artyp keledi. Alǵashqy naýqastar tirkelgen kúnderi (15 qańtar) esepke 41 adam alynǵan bolatyn.
Sońǵy málimetter boiynsha koronavirýs aýrýymen aýyrǵandar sany 2,7 myń adamnan asty, 80 adam ólimi tirkelgen. Jańa koronavirýstyq infektsiiamen aýyratyn adamdardyń kópshiligi Hýbei provintsiiasynda (1 423, 76-sy qaitys bolǵan). Qazaqstanmen shekaralas QHR Shyńjań-Uiǵyr avtonomiialyq aýdanynda (ShUAR) 5 adamnyń aýrýdy juqtyrǵany anyqtaldy.
Qazaqstan koronavirýsty zerthanalyq jaǵdaida anyqtaýǵa múmkindik beretin praimerlerdi satyp alýdy bastady.
QR Densaýlyq saqtaý ministrligi elimizde infektsiia tirkelmegenin resmi málim etti.
QR Syrtqy ister ministrliginiń aqparatynsha, karantinge jabylǵan Qytaidyń Ýhan qalasynda búginde Qazaqstannan 230 stýdent oqidy. Olardyń 98-i ǵana qalada qalyp otyr. Qalǵandary demalystyń bastalýyna bailanysty Qazaqstanǵa jáne basqa da elderge ketip qalǵan.
Elimiz óńirlerindegi barlyq áýejailarda profilaktikalyq sharalar jáne oqý-jattyǵý jumystary júrgizilýde.
