Qytaidyń «Singer» baiqaýynda juldyzy janǵan Dimash Qudaibergenniń qytailyq fanattary qazaqstandyq jankúierler men BAQ-qa ókpe-nazyn bildirdi. Olar Dimashtyń elge oralǵanyna bir apta ótse de, ánshi týraly jan-jaqty jańalyqtar shyqpady, qazaqstandyq jankúierler belsendilik tanytpady, Dimashtyń qaida, ne istep júrgenin bilmei habarsyz qaldyq dep renjýli.
Ǵalamtorda «Dimashtyń Qytaida taǵy biraz qalǵany durys edi» atty forým ashylyp ánshiniń qytailyq jankúierleri onda osy taqyryp boiynsha óz pikirlerin jazdy. Jeli qoldanýshylary Dimashtyń tanymaldylyǵy báseńdep qalmasa igi edi dep bolashaǵyna alańdaýshylyq bildirdi.
«Qytaida qazaqstandyq jáne qytailyq jankúierler Dimash týraly aqparattardy der kezinde bilip otyrdy. Al Qazaqstanda qytai túgili, qazaq jankúierlerdiń ózi Dimashtyń ne istep júrgenin bilmeidi. Jalpy alǵanda, Qytaidyń aqparat taratý áleýetiniń Qazaqstannan kúshti ekenin osydan bilýge bolady», - dep jazdy love2015season esimdi qoldanýshy.
«Bul eki eldiń shoý-biznesiniń jer men kóktei aiyrmashylyǵyn bildiredi. Qazaqstannyń shoý biznesi Qytaidaǵydai jolǵa qoiylmaǵan, ondaǵy «Dears» (Dimashtyń jankúierleri) sany az. Dimash elge oralǵanda memlekettik deńgeide jaqsy qarsy alyp edi, biraq odan keiin bir apta ótti, esh habar joq», - dep jazdy Dryad esimdi qoldanýshy jáne ol: «Dimash endi ǵana tanylyp keledi, eger ol bir apta boiy jurt nazarynan tys qalsa, osyǵan deiin jinaǵan ataq-abyroiy joǵalyp ketýi múmkin. Tutas bir apta boiy jańalyq lentasynda kórinbegen juldyzdy fanattar kútip otyrady deimisiń? Olardyń nazaryn basqa juldyzdar aýdaryp áketedi. Osyǵan menedjerler kóńil bólýi tiis», - dep óz sózin tolyqtyrdy.
Ózin LL dep tanystyrǵan qoldanýshy qazaqstandyq fanattardyń da alańdap otyrǵanyn jetkizdi: Ha-ha, myna sýretti kórip kúldim. Qytailyq fanattar ǵana habarsyz qaldy desem, qazaqstandyq fanattardyń da jaǵdaiy máz emes eken.
«Qazaqstanda Dimashtyń júris-turysy, kiimi, tanylýy, imidjimen ainalysatyn komanda joq sekildi. Bar bolsa da, Qytaidaǵydai bolmaityn tárizdi», - dep jazdy Dryad. Oǵan qoldanýshy momowx77 jaýap berdi:
«Múmkin, solai bolar. Dimashtyń ata-anasy óz suhbattarynda Dimashtyń fan-paraqshasy joq ekenin, tek ózderiniń paraqshasynda ǵana aqparat jariialanatynyn aitqan edi».
Dryad: Qytailyq juldyzdardyń kún tártibi birneshe ai buryn belgilenip, jańalyqtar josparly túrde ýaqytymen shyǵyp otyrady. Al Qazaqstanda Dimashtyń jumys kestesi joq sekildi. Bir apta boiy Dimash týraly eleń etkizer aqparat kórmedik, - dep synǵa aldy.
Aita keteiik, Qytaida jankúierlik mádeniet jaqsy damyǵan. 2000 jyldary ońtústik-shyǵys Aziiaǵa áigili anshi, akter Liý De Hoamen kezdesý úshin qytailyq qyz óz baspanasyn satyp, Gonkongqa barǵan jáne bul qadamǵa eshqashan ókinbeitinin, kýmirimmen júzdessem degen armanynyń oryndalǵanyn aitqan. Dimashty da qytailyq jankúierleri tań qaldyrýdan jalyqpady. «Máńgi súiip ótemin» uǵymyn bildiretin 1314 raýshan gúlin, Dimashtyń atymen úi syrtyn bezendirýin, arnaiy Qazaqstannan Dimashqa tamaq ákep bergenderin atap ótpeýge bolmaidy.
Buǵan deiin, «Guardians护卫队» qytailyq jankúierler tobynyń Dimashtyń týǵan kúnin Astanadaǵy úlken LED ekrandar arqyly quttyqtaityny, onda jankúierler daiyndaǵan arnaiy filmniń kórsetiletini habarlandy.
29 naýryzda «迪玛希Dimash全球后援会» (Dimashtyń álemdik jankúierleri toby) qytailyq 101 FM radio media ortalyǵy jariialaǵan báigede Dimashqa kóp daýys jinap, Dimashtyń beinesi Niý-Iork qalasynyń ortalyq Manhetten aýdanynda ornalasqan Taim Skver alańyndaǵy úlken LED ekranynda kórsetý qurmetine ie boldy.
2 sáýirde «Dearest迪玛希公益站» (Dimash qaiyrymdylyq toby) qytaidyń Tiianjin qalasyndaǵy «SOS» balalar úiiniń tárbielenýshilerine qarajat jinap, Dimashtyń atynan materialdyq kómek jasady.
11 sáýirde Shanhai qalasynyń turǵyny Dimash Qudaibergenniń «Singer2017» án baiqaýynyń birinshi kezeńinde kigen sahnalyq kiimin 158 890 iýanǵa (7,2 million teńge) satyp alǵan. Satyp alýshy óziniń weibo jeke paraqshasynda (@SophieSSJ1115) Dimashqa jáne ózi siiaqty barlyq jankúierlerge alǵys aitty. Óziniń shyǵarǵan aqshasynyń kómekke zárý balalardyń jaǵdaiyn jaqsartýǵa jumsalatynyna qýanyshty ekenin, sondai-aq, Dimashtyń qytaidaǵy birinshi sahnalyq kiiminiń ánshi úshin airyqsha mańyzdy dep oilaityndyǵyn jáne kiimdi Dimashqa qaitaryp beretinin málim etken.
«迪玛希海外资源原博» toby Dimashtyń, Alpamystyń jáne ata-anasynyń instagramdaǵy jańalyqtaryn der kezinde qazaq tilinen qytai tiline aýdaryp otyrady. Sondai-aq, QazAqparattyń Dimash týraly qazaqsha, oryssha jáne qytaisha aqparattarymen bólisip otyrǵan.
