Sońǵy birneshe aida Qytaida koronavirýs qaita órshigen. Densaýlyq saqtaý organdary Pekinge jaqyn Hebei provintsiiasynda 8 kún ishinde 364 adamnan koronavirýs infektsiiasy anyqtalǵanyn habarlady. Bul - sońǵy 5 aida tirkelgen eń joǵary kórsetkish. Ulttyq densaýlyq saqtaý komissiiasy 10 qańtarda bir kúnde anyqtalǵan 69 naýqastyń 46-y Hebeide tirkelgenin habarlady.
Bir jyl buryn Qytaidyń Ýhan qalasynda koronavirýstan bir adam qaitys bolyp, qala indet oshaǵyna ainalǵan. Qytai biligi demalys kúnderi bul datany elemedi. Byltyr 11 qańtarda qytailyq BAQ 61 jastaǵy turǵynnyń belgisiz virýstan qaitys bolǵanyn habarlaǵan. Ol Ýhandaǵy et satatyn bazarǵa barǵan. Virýs osy bazardan belgisiz jaǵdaida tarady dep aitylady.
Qazir Ýhan qalasy qalypty tirligine oralǵan. Munda byltyr jyl basynda eki ai boiy qatań karantin engizilgennen keiin virýs azaiǵan.
Amerikalyq Djons Hopkins ýniversitetiniń málimeti boiynsha, álemde keminde 90 million adamǵa koronavirýs juqqan. 1,9 mln adam qaitys bolǵan. Bul derek qory álem úkimetteriniń resmi málimetine súienip jasalǵandyqtan shynaiy kórsetkish odan áldeqaida kóp bolýy múmkin.
Osyǵan deiin halyqaralyq qaýymdastyq Qytai biligin koronavirýs qaýpi jaily aitqandardy qýdalady, naýqastar sanyn jasyrdy dep aiyptap, ótkir synaǵan.
