Qytai Halyq Respýblikasynyń Qazaqstan Respýblikasyndaǵy tótenshe jáne ókiletti elshisi Chjan Siao eki el arasyndaǵy qarym-qatynasqa bailanysty jazylatyn túrli jazbaǵa qatysty pikir bildirdi, dep habarlaidy Baq.kz agenttigi.
Diplomat Qytai men Qazaqstan arasyndaǵy bailanystyń mańyzyn aita kele, «Qytaidyń Qazaqstandy jaýlap alǵysy keletin geosaiasi jospary joq» dedi.
«Qytai Qazaqstan territoriiasynyń bóligin jaýlap almaqshy, Qytai Qazaqstan territoriiasynyń bóligin jaýlap alǵysy keledi» nemese «Qazaqstan ekonomikasyna aila-sharalar qoldanady» degen «Qytaidyń Qazaqstandy jaýlap alǵysy keletin geosaiasi jospary bar» dep jazatyndar bar. Mundai jazbalar boldy, qazir de bar. Bárin jaqsy bilemiz. Biraq mundai jazbalarǵa mán berýdiń qajeti joq. Mundaidy jazatyn ne aitatyn adamdardyń ne basy joq, ne basy «jaman, las», ia bolmasa bireýdiń tapsyrmasymen jazatyndar. Sondyqtan búgingi kórme bir-birimizdi jaqsy tanýǵa, qarym-qatynasymyzdy odan ári jaqsartýǵa kómektesedi. Búginde óte mańyzdy mádeni-gýmanitarlyq jaǵymyzdy yńǵailastyrýǵa yqpal etedi. Qazir eki eldiń qarym-qatynasy óte joǵary deńgeide. Ótken jyly Nursultan Nazarbaev Qytaida boldy. 2019 jyl da ekijaqty qarym-qatynas úshin iri oqiǵalarǵa toly bolady dep oilaimyn», - dedi elshi Ulttyq mýzeide qytailyqtardyń jańa jyl merekesine orai uiymdastyrylǵan «Kóktem merekesi» kórmesiniń ashylý saltanatynda.
Diplomat Qazaqstannyń Qytai úshin mańyzdylyǵy men qos eldiń arasyndaǵy qatynastyń maqsatyna taǵy toqtaldy.
«Únemi osyndai sózderdi jazatyndardyń jazbasy kúlkili. Qytai óziniń myńjyldaǵan tarihynda eshkimniń territoriiasy ózdiginen shabýyl jasamady, eshkimniń territoriiasyn tartyp almady. Qytailyqtar ǵasyrlar boiy otbasynda, kórshilermen, qoǵamda úilesimde bolýdy dáriptep keledi. Sondyqtan taǵy aityp ketemin, bul jazbalar – bireýdiń tapsyrysymen ne «basy» joq adamnyń jazǵany. Qazaqstan Qytai úshin strategiialyq seriktes, jaqyn kórshi, eski dos jáne biz ekijaqty dostyq, teńquqyly, ekijaqqa da tiimdi qarym-qatynas ornatýǵa niettimiz. Bizdiń basqa maqsatymyz ne oiymyz joq jáne bolýy múmkin emes», - dedi elshi jýrnalisterge.
Biyl Qytai jańa jyly 2 aqpanda bastalady. Osy airyqsha kúnge orai Qytai Halyq Respýblikasynyń elshiligi men Qazaqstannyń Ulttyq mýzeii birlese «Kóktem merekesi» fotokórmesin uiymdastyrdy.
