Beijińge kórshiles jatqan Hebei provintsiiasynyń úsh qalasyndaǵy 22 millionnan astam turǵyn koronavirýstyń qaita órshýine bailanysty oqshaýlandyryldy, dep habarlaidy "Ult aqparat".
Hebei provintsiiasynda COVID-19-dyń órshýine bailanysty Shitsziachjýan, Sintai jáne Lanfan qalalary oqshaýlandyryldy. Bul shaharlarda turatyn halyq sany 22 millionnan asady.
Qytaida 2021 jyldyń basynan koronavirýstyń jańa jaǵdailary kúrt artty. Indetti eń kóp juqtyrǵandar Shitsziachjýan qalasynda tirkeldi. 11 million turǵyny bar Shitsziachjýanda seisenbiden bastap halyqty jappai testileýdiń ekinshi kezeńi bastaldy.
Qytai biligi Hebei provintsiiasynyń basqa qalalarynyń turǵyndaryna Beijińge barmaýǵa keńes berip otyr.
Jalpy, biylǵy jyldyń 2 qańtarynan bastap Hebei provintsiiasynda koronavirýs 400-den astam adamda rastalǵan jáne 200-den astam simptomsyz tasymaldaýshy anyqtalǵan.
