Dimash Qudaibergenniń qytai jankúierleri onyń dúniege tanymal ánshi bolýyn armandaidy, - dep habarlaidy Tengrinews.kz tilshisi ánshiniń dosy Alpamys Sharimovke silteme jasap.
Búgin ánshiniń Shanhai qalasynda kontsert berip jatqany belgili. Qazaqstandyq ánshiniń qytailyq jankúierleri onyń kele jatqan 24 mamyrdaǵy týǵan kúnine orai tosynsyi jasady. Olar oryndaýshyǵa alǵys hat pen úlken tort ázirlepti. Eń qyzyǵy alǵys hatta jazylǵan sózder, sebebi onda jankúierler mektepterde Dimashtyń atyndaǵy kitaphanalar ashyp, jaǵdaiy nashar otbasylardan shyqqan balalarǵa tegin túski as berip, jańa kiimder usynypty. Hattyń mátinin tolyq jariialaýdy jón kórdik:
"Qurmetti Dimash, 24 mamyr jankúierlerińiz kópten kútken týǵan kúnińiz, sizdiń Qytaida tuńǵysh ótken týǵan kúnińizdi eske saqtaý úshin, Dimash China music fan club músheleri sizge erekshe bir týǵan kún tartýy - "Áleýmettik igilik kýáligin" usynýdy jón kórdik. Pikirlesý arqyly, biz "tegin túski taǵam" jáne "jelken jaiý jospary" syndy eki jobany talqyladyq. "Tegin túski taǵam qory qoǵamy" arqyly, kedei aimaqtaǵy balalardyń tegin túski taǵamdar jei alýyna kómektestik. "Jelken jaiý jospary" arqyly qiynshylyǵy aýyr óńirdegi bastaýysh mektepke 496 kitap jylý berýmen birge "Dimash kitap bólmesin" qurdyq jáne basqalai oqytý quraldary, jańa kiimderdi usyndyq", - delingen hatta.
Al bul jobany atqarýynyń sebebi dep jankúierler Dimash Qudaibergenniń án keshin tabysyn jylýǵa ataý arqyly, elge kómektesýin jáne osydan ózderiniń erekshe áserlengenin aityp otyr.
"Sizdiń qadamyńyzdy basyp, sizben birge áleýmettik igilik isterine bir kisilik úlesimizdi qosýǵa bekidik. Sizdei ánshiniń jankúieri bolǵanymyzdy maqtanysh tutamyz, sizdiń boiyńyzdaǵy kóptegen asyl qasietter bizdiń úirenýimizge tatidy. Sońynda týǵan kúnińiz qutty bolsyn, densaýlyǵyńyz myqty bolsyn, budan bylaiǵy jumystaryńyzǵa sáttilik tilei otyryp, sizdiń birte-birte dúniege tanymal áigili ánshi bolýyńyzǵa tilektestik bildiremiz ári osyǵan kýá bolýdy armandaimyz", - dep jazylǵan quttyqtaýda. © Alpamys Sharimov Al osynyń aldynda ánshi Kann festivaline qonaq bolyp barǵan edi. Aita keteiik, Dimash Qudaibergenniń Bastau dep atalatyn jeke án keshi 27 maýsymda Astanada ótedi. Oǵan qazirdiń ózinde qazaqstandyqtarmen birge sheteldik tabynaýshylary da bilet satyp alyp jatyr. Bastau kontserti EXPO-2017 qarsańynda "Astana Arenada" bolady.
