Syrtqy ister ministrligi koronavirýsqa bailanysty Qytaiǵa barýdy josparlap otyrǵandardy saq bolýǵa shaqyrdy, dep habarlaidy QazAqparat.
«Qytai Halyq Respýbikasynyń Ýhan qalasynda qozdyrǵyshy koronavirýstyń jańa túri bolyp tabylatyn pnevmaniia aýrýynyń kóptegen jaǵdaiy tirkelgen. Búgingi kúni juqtyrǵandardyń sany 830-dan asyp, 25 adam kóz jumdy. Qazirgi ýaqytta Qytaidyń densaýlyq saqtaý organdary osy virýstyń provintsiiadan tys jerlerde keń taralýyn boldyrmaý jóninde tiisti sharalardy qabyldaýda. Ýhan qalasynda jáne Hývei provintsiiasynyń basqa da jaqyn qalalarynda karantin rejimi engizildi. Kólik qatynastarynyń barlyq túrleri toqtatyldy», - dedi Aibek Smadiiarov SIM-de ótken baspasóz máslihatynda.
Onyń aitýynsha, QR SIM Qytaiǵa barýdy josparlap otyrǵan Qazaqstan azamattaryna tiisti saqtyq sharalaryn qabyldaýdy jáne epidemiologiialyq qaýipti joiǵanǵa deiin juqtyryp alý qaýpi joǵary Ýhan qalasy men Hývei provintsiiasyna barýdan ýaqytsha bas tartýdy usynady. Sonymen birge, adamdar kóp jinalatyn oryndarǵa barýdan aýlaq bolý, jergilikti biliktiń talaptaryn qatań saqtaý qajet.
«Aýrýǵa kúdik týǵan jaǵdaida dereý meditsinalyq mekemege baryp, Qazaqstannyń Qytaidaǵy elshiligine habarlasý kerek. QR Densaýlyq saqtaý ministrligi SIM-men birlese otyryp, Qytaidaǵy epidemiologiialyq jaǵdaidy muqiiat qadaǵalaýda. Aýrýdyń elimizge jetip, taralý qaýpin aldyn alý maqsatynda QR-da sanitarlyq epidemiiaǵa qarsy jáne profilaktikalyq sharalar kesheni qaralyp jatyr», - dedi ol.
Aibek Smadiiarov qazir Qazaqstandaǵy áýejailarda sanitarlyq karantindik baqylaý júzege asyrylyp jatqandyǵyn málim etti.
«Barlyq jolaýshy teplovizor skanerinen ótýde, bul Qytaidan keletin reisterge kúsheitildi», - dedi ol.
