Qytaida qazaqstandyq stýdent qyz qaitys boldy. Qazaqstan SIM baspasóz qyzmetiniń basshysy Ánýar Jainaqov oqiǵanyń mán-jaiyn aityp berdi, - dep habarlaidy Tengrinews.kz.
SIM baspasóz qyzmeti mamandarynyń habarlaýynsha, oqiǵa 1 jeltoqsan kúni bolǵan. Sol kúni keshke 19 jastaǵy stýdent qyz qurbysymen birge tanysynyń týǵan kúnine barypty, tanysy - Pákistan azamaty.
"Qolda bar málimetter boiynsha, qyz qaitys bolǵan kúni tanysy men onyń dosynyń úiinde, týǵan kúnde bolǵan, tanysy - Pákistannyń azamaty. Biraz ýaqyt ótkende qyzdyń 14-qabattaǵy terezeden qulap, mert bolǵany anyqtaldy", - dedi Jainaqov.
SIM baspasóz qyzmeti jetekshisiniń habarlaýynsha, sol keshte qyzdarmen birge bolǵan eki jigit qamaýǵa alyndy.
"Oqiǵadan keiin politsiia tergeýdi bastady. Pákistannyń eki azamaty qamaýǵa alyndy. Olardyń bireýi áli de qamaýda otyr, al ekinshisi eshqaida ketpeý týraly qolhatpen bosatyldy. Politsiia zorlaý deregin rastamady. Qazirgi tańda tergeý júrip jatyr", - dep habarlady Jainaqov.
Qaitys bolǵan qyzdyń qurbysy da Qazaqstannan barǵan stýdent. Ol Sýchjoý qalasyndaǵy ýniversitetterdiń birinde marqum qyzben birge bir ýniversitette, biraq parallel kýrsta oqyǵan.
"Pákistan azamattaryna qatysty maǵlumat óte az, tergeý múddesine bailanysty aqparat taratylmai otyr", - dedi Jainaqov.
"Bizdiń diplomattar oqiǵa týraly habardy esti sala, qyzdyń týystarymen habarlasyp, qaiǵyly oqiǵany jetkizip, denesin Qazaqstanǵa jetkizý úshin qajetti kómektiń barlyǵyn kórsetti. Bul másele qazaqstandyq diplomattardyń jiti baqylaýynda. Sonymen qatar, qyzdyń týystaryna jergilikti advokat berildi. Qyzdyń denesi Qazaqstanǵa 25 jeltoqsan kúni jetkizildi. Ata-anasy qyzdarynyń neden qaitys bolǵanyn anyqtaityn tergeýdiń aiaqtalýyn kútip otyr", - dep habarlady SIM baspasóz qyzmetiniń jetekshisi.
