Qytaida ómir boiyna bas bostandyǵynan aiyrylǵan qazaqstandyq Aqjarqyn Turlybaidyń jazasy biyl qaita qaralýy múmkin. Bul týraly qyzdyń advokaty Suńqar Nurmaǵambetov habarlady, - dep jazdy Sputnik Qazaqstan.
Ol Aqjarqynnyń úige qashan oralatyny kóp adamdy mazalaityn suraq ekenin atap ótti.
"Jaza osy jyly qaita qaralýy múmkin. Kúsh-jigerimizdi salyp jatyrmyz", - dep jazdy Nurmaǵambetov Facebook-te.
Advokat Qazaqstan men Qytai arasynda sottalǵandardy berý týraly ekijaqty kelisim-shart baryn eske saldy. Ol birneshe protsedýradan turady.
Aitýynsha, ómir boiy bas bostandyǵynan aiyrý jazasyn bas bostandyǵynan aiyrýǵa qaita qaraý týraly sheshim Turlybaidy elge qaitarýǵa tikelei septigin tigizedi.
Sondai-aq Qazaqstannyń bas prokýratýrasyna sottalǵan azamatty qaitarý týraly qoldaýhat jiberý kerek. Nurmaǵambetov ony 2016 jyldyń sáýirinde joldap qoiǵan.
Budan bólek, Qazaqstan bas prokýratýrasy men syrtqy ister ministrliginiń Qytai tarapymen ózara is-qimyly da sottalǵandardy qaitarýǵa áser etedi.
Aqjarqyn Turlybaidyń isi
Qazaqstan azamaty Aqjarqyn Turlybai 2014 jyly naýryzda Gýanchjoý áýejaiynda ustalǵan bolatyn. Oǵan shekaradan 4,5 keli esirtkini alyp ótpek boldy degen aiyp taǵyldy. Ol kezde otandasymyz 20 jasta bolǵan edi. 2015 jyldyń maýsymynda Qytai soty ony ómir boiyna bas bostandyǵynan aiyrdy. Sotta Aqjarqyn sheteldik dosy aldap ketkenin aityp, kinásin moiyndaǵan joq.
2016 jyly sot sheshimi joiylyp, is qaita qaraýǵa jiberildi.
Araǵa úsh jyl salyp, 2019 jyldyń 27 jeltoqsanynda Gýanchjoý soty úkim shyǵardy – jaza ózgerissiz qaldy.
2019 jyly Turlybaidyń anasy Zýhra Seitimova Qazaqstan prezidentine kómek surap hat jazdy.
2019 jyly qyrkúiekte prezident Qasym-Jomart Toqaev Qytaiǵa sapary kezinde izgilik tanytyp, Aqjarqyndy Otanyna qaitarýǵa járdemdesýge shaqyrdy.
Advokattyń aitýynsha, Aqjarqyn otbasymen turaqty habarlasyp turady, hat jazady.
Buǵan deiin Qazaqstannyń Qytaidaǵy elshiligi Turlybai qasyndaǵy sottalǵandarǵa aǵylshyn tilin úiretip júrgenin habarlaǵan edi. Sonymen qatar, ol kórkem ádebiet oqidy, dene shynyqtyrýmen de ainalysady. Qytai tilin jaqsy meńgerip alǵan.
