Qytai koronavirýs infektsiiasyn juqtyrǵandar sany kúrt azaiǵanyn málimdedi. Epidemiianyń beti qaitty dep aitýǵa múmkindik týǵanmen, kóz jumǵandar sany azaimai otyr.
Qytaidyń densaýlyq saqtaý jónindegi ulttyq komissiiasy 20 aqpanda virýs oshaǵy sanalatyn Hýbei provintsiiasynda 628 adamnan virýs tabylǵanyn, Qytaidyń ózge aýdandarynda 45 oqiǵa tirkelgenin habarlady. Virýsty juqtyrý qarqynynyń báseńdegenine úsh kún boldy. Jalpy elde jeltoqsan aiynan beri 74 myńnan astam adamnan virýs tabylǵan.
Qytai biliginiń aitýynsha, sońǵy táýlikte 114 adam kóz jumǵan. Elde virýstan qaitys bolǵandar sany 2118-ge jetti.
Iran virýs juqqan eki adamnyń kóz jumǵanyn habarlady. Bul - Taiaý Shyǵys aimaǵynda tirkelgen alǵashqy ólim.
Japoniiada virýs tabylǵan Diamond Princess kemesindegi bir áiel men er adam qaitys boldy.
Dúniejúzilik densaýlyq saqtaý uiymynyń tótenshe jaǵdaida táýekeldi basqarý departamentiniń direktory Richard Brennonnyń aitýynsha, Qytai virýspen kúres boiynsha "qysqa ýaqyt aralyǵynda zor nátijege qol jetkizdi", alaida daǵdarys bitti dep aitýǵa áli erte.
Qytai biligi buǵan deiin 60 mln-nan astam halyq turatyn birneshe iri qalasyn jaýyp, qalalarǵa qatynaityn kólik qozǵalysyn toqtatqan. Keibir memleketter Qytaidan keletin azamattardyń elge kirýine tyiym saldy. Pekin bul sharalardy synady.
