Qytaida qaýipti koronavirýs juqtyrǵan naýqastardyń sany artyp, qyryq adamnan asty. Eldiń bir turǵyny qaitys boldy. Ǵalymdardyń boljaýynsha, virýs adamnan adamǵa ótýi múmkin.
Infektsiia birtindep basqa elderge ótip jatyr. Alǵashqy oshaq Japoniiada paida boldy. Bul jaǵdai qazaqstandyq sanitarlyq dárigerlerdi qatty alańdatty. Bilik infektsiianyń aldyn alý úshin vokzaldar men áýejailarda baqylaýdy kúsheitti, dep habarlady "Astana" arnasy.
Qytai ólshemimen alǵanda Ýhan - shaǵyn qala. Sońǵy birneshe aptada ol bir adamnyń ómirin qiǵan jańa virýstyń arqasynda búkil álemge tanymal boldy. Sarapshylar qozdyrǵysh koronavirýstyń jańa túri ekenin anyqtady. Qazir 500-ge jýyq adam, onyń ishinde naýqastarmen bailanysta bolǵan dárigerler baqylaýǵa alyndy. Dúniejúzilik densaýlyq saqtaý uiymy infektsiia balyq bazarynan shyqqan dep sanaidy.
"Jalpy jaǵdai baqylaýda, keibir naýqastar úiine jiberildi. Keibireýleriniń jaǵdaiy aýyr. Dúniejúzilik densaýlyq saqtaý uiymy bul aýrýdyń paida bolýynan qaýiptenip otyr", - deidi Beijiń ýniversiteti birinshi aýrýhanasynyń dárigeri Van Gýanfa.
Qazaqstan biligi qaýipti virýs shekaradan ótpeýi úshin qoldan kelgenniń bárin jasaýda. Qazir barlyq áýejaida, temirjol vokzaldary men kólik quraldarynyń kirý pýnktterinde sanitarlyq qyzmetter jumys istep jatyr. Eger jolaýshydan aýrýdyń belgileri anyqtalsa, ekipaj ne isteý kerektigin biledi.
"Búgingi tańda jalpy 12 myńnan astam adam tekserýden ótti. Qytaidan kelgender arasynda ystyǵy kóterilgen jáne aýrýdyń belgileri baiqalǵan adam anyqtalǵan joq. Naýqastardy ýaqytyly anyqtaý úshin biz koronavirýstyń jańa túrin diagnostikalaýǵa zerthanalar daiyndadyq. Ol úshin bizde barlyq qajetti reagenttar men jabdyqtar bar", - dep túsindirdi Qazaqstan Respýblikasynyń bas memlekettik sanitarlyq dárigeri Jandarbek Bekshin.
Virýs Japoniiaǵa jetkeni belgili boldy. Naýqas jaqynda Ýhanda bolyp, infektsiia juqtyrǵan. Qazir onyń ómirine esh qaýip tónip turǵan joq. El úkimeti aýrý týraly aqparat jinaityn daǵdarystyq shtab qurdy.
