Qytaida órship jatqan koronavirýs Qazaqstan aýmaǵynda tirkelgen joq. Bul týraly búgin Ortalyq kommýnikatsiialar ortalyǵynda ótken brifingte QR Densaýlyq saqtaý ministrligi Taýarlar men kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary Jandarbek Bekshin málim etti, dep habarlaidy QazAqparat.
«Dúniejúzilik densaýlyq saqtaý uiymynyń málimetinshe, Qytai Halyq Respýblikasynda 23 qańtarǵa deiin koronavirýstyq infektsiiany juqtyrýdyń 571 jaǵdaiy tirkelip, 17 adam kóz jumdy. Qytai epidemiologtarynyń aqparatyna sáikes, bul infektsiia Ýhan qalasynda ornalasqan Hýanan teńiz ónimderiniń kóterme saýda bazarlarynda taralýda. Ol jaqta teńiz ónimderi men janýarlar ónimderin satatyn 7 bazar bar», - deidi Jandarbek Bekshin.
Ol bul infektsiianyń paida bolý jáne taralý joldary naqty dáleldenbegenin atap ótti.
«Aýyrǵan adamdardyń kóbi bazarlarmen bailanysty bolǵandyqtan basa nazar aýdaryp jatyr. Ol jerde bireý – satýshy, endi biri – óndirýshi, satyp alýshy. Dúniejúzilik densaýlyq saqtaý uiymy buryn bul infektsiia adamnan adamǵa juqpaitynyn aitsa, qazirgi ýaqytta adamnan adamǵa juqqan jaǵdailar bar ekenin aitýda. Virýs biik kontsentratty bolǵan kezde adamnan adamǵa juǵady. Biz Ýhan qalasyndaǵy jaǵdaidy táýlik boiy nazarǵa alyp jatyrmyz. Qazirgi ýaqytta QHR jergilikti biligi bul qalany karantinge qoidy», - deidi ol.
Sondai-aq komitet orynbasary Qazaqstanda bul jaǵdaiǵa bailanysty qandai sharalar qolǵa alynǵanyn aitty.
«Ýhan qalasy karantinge qoiyldy. Demek, qalaǵa kirýge de, shyǵýǵa da bolmaidy. Bul – óte durys sheshim. Óz tarapymyzdan qazaqstandyqtarǵa, ásirese áýe jolymen júretinderge túsindirý júrgizip jatyrmyz. Bas sanitarlyq dárigerdiń 6 qańtar kúngi qaýlysy boiynsha, Qytaidan kele jatqan jolaýshylar termometriiadan ótedi. Qazirgi tańda 13 myńnan astam jolaýshy termometriiadan ótti. Infektsiiany anyqtaý jaǵdailary tirkelmedi. Áýejailarda karantin pýnkti ornalasqan. Ýhan qalasynan Qazaqstanǵa tikelei reis joq. Biraq Almatydan QHR-ǵa - 5 reis, Nur-Sultan qalasynan 3 reis bar. Osy reisterge úlken mán beriledi. Sondai-aq, shekaralyq jerlerde de jaǵdai qatań baqylaýǵa alynǵan. Ekinshiden, ushaqtaǵy ekipaj múshelerimen jumys jasap jatyrmyz. Olarǵa aýrý belgileri qandai bolatynyn túsindirilýde. Ushaqtar 6 saǵattan astam ýaqyt ushady. Sol kezde jolaýshylardyń dene qyzýy kóterilse, jótelse, entikse, boiyn álsizdik bilese – mán berýleri kerek. Tumaý men koronavirýstyq infektsiianyń belgileri uqsas, osy jaǵynan anyqtaýǵa qiyndyq týady», - dedi J.Bekshin.
Eske sala ketsek, buǵan deiin Qazaqstan Qytaidaǵy koronavirýsqa bailanysty shekarada baqylaý sharalaryn kúsheitkenin jazǵan bolatynbyz.
