Koronavirýs infektsiiasyn juqtyrý qaýpiniń aldyn alý maqsatynda Qytaida oqityn Qazaqstan stýdentteriniń kóbi oqýyn onlain rejimde jalǵastyryp jatyr, dep habarlaidy QazAqparat.
«Qytaidaǵy qazaqstandyq stýdentterdiń basym kóbi ol elden ketip qalǵan. Stýdentterdiń ótken aida demalys kúnderi sozylǵan edi. Qytaidaǵy biraz ýniversitette oqý bastalyp ketkenimen, birqatarynda oqý onlain-rejimge aýystyryldy. Kóbinese bizdiń stýdentter onlain-rejimde oqýyn Qazaqstanda jalǵastyryp jatyr. Barlyq oqý oryndarynda onlain oqý jolǵa qoiyldy dep aita almaimyn. Sebebi Qytaidaǵy Joǵarǵy oqý oryndarynyń bárinde ondai tehnikalyq múmkindik joq», - dedi Aibek Smadiiarov tilshiniń suraǵyna jaýap bere otyryp.
Áitse de osyndai onlain oqytýǵa tehnikalyq múmkindigi joq ýniversitetterde oqityn jastardyń jaǵdaiy ne bolmaq? Syrtqy ister ministrliginiń resmi ókiliniń aitýyna qaraǵanda ondai jaǵdaida qazaqstandyq stýdentter tikelei ýniversitterge shyǵyp, máselelerin sheshýi tiis.
«Eger «Bolashaq» baǵdarlamasy boiynsha barǵan stýdentter bolsa ondai jaǵdaida kelissóz júrgizemiz. Al jeke ózi túsken stýdentterdiń máselesine aralasa almaimyz. Olardyń ózderi sheshim qabyldap, tikelei ýniversitetpen sóilesýi kerek», - dedi ol.
Aibek Smadiiarov Qytaidan koronavirýs infektsiiasy taraǵan Ýhan qalasynan ketýden bas tartqan birqatar qazaqstandyq stýdent baryn da aityp ótti.
Eske sala ketsek 2020 jyldyń 2 aqpanynda QR DSM Ulttyq shuǵyl meditsina úilestirý ortalyǵy Qytaidyń Ýhan qalasynan 83 qazaqstandyqty, onyń ishinde 80 stýdentti elge jetkizgen edi.
Arada eki apta ótkennen keiin Ýhannan evakýatsiialanǵan stýdentter elordadaǵy Kópsalaly meditsinalyq ortalyqtyń juqpaly aýrýlar bóliminen shyǵaryldy. Olardyń eshbirinde koronavirýs infektsiiasy anyqtalǵan joq.
