Qytaidyń ulttyq densaýlyq komissiiasy 11 aqpanda koronavirýstan kóz jumǵandar sany 1113-ten asqanyn habarlady, bir táýlik ishinde 97 adam qaitys bolǵan. 44 643 adam virýsty juqtyrǵan. Alaida virýsty juqtyrý oqiǵasynyń azaiǵanyna eki kún boldy. Ótken táýlikte 2015 jańa jaǵdai tirkelgen.
Dúniejúzilik densaýlyq saqtaý uiymy jańa virýstan paida bolǵan aýrýǵa COVID-19 degen at berdi.
11 aqpanda Jenevada ótken konferentsiiada uiym basshysy Tedros Gebreiesýs álem elderin "iri qaýipke" tótep berýge shaqyrdy. Onyń aitýynsha, virýstar "adamdardy qyrý jaǵynan kez kelgen sodyrdan asyp túsedi". Uiym basshysy Qytai ǵana emes, ózge elderge de qaýip tónip turǵanyn aitty.
COVID-19 aýrýy adamnan adamǵa tez juǵady. Qytaidan tys aýmaqta eń iri virýsty juqtyrý oqiǵasy Japoniiada tirkeldi. Iokagama portynda karantinde turǵan Diamond Princess kemesinde virýsty juqtyrǵandar sany 174 adamǵa jetti. Bir táýlik ishinde 39 adamǵa virýs juqqan. Kemeni teksergen Japoniianyń densaýlyq saqtaý mamandarynan da virýs belgileri tabylǵan.
Diamond Princess 20 qańtarda Japoniianyń Iokogama qalasynan Kagosima - Gonkong - Okinava baǵyty boiynsha eki aptaǵa saiahatqa shyqqan. Keiinirek Gonkongte jaǵaǵa túsken jolaýshylardyń birinen virýs tabylyp, 3 aqpanda Iokogama portyna toqtap, karantinge jiberildi.
Keme bortynda 3 700 jolaýshy jáne ekipaj múshesi bolǵan. Keme 19 aqpanǵa deiin karantinde bolady.
