Qytaida Interpoldyń burynǵy tóraǵasy para alǵany úshin 13 jyl 6 aiǵa bas bostandyǵynan aiyryldy, dep habarlaidy Sinhýa agenttigi.
Tiantszin qalasynyń soty 21 qańtarda Qytaidyń burynǵy qoǵamdyq qaýipsizdik vitse-ministri jáne Qytai teńiz politsiiasynyń burynǵy direktory Men Hongveidiń paraqorlyq isi boiynsha alǵashqy sot úkimin jariia etti. Sottalýshy Men Hongveige para alǵany úshin 13 jyl alty aiǵa bas bostandyǵynan aiyrý jazasy taǵaiyndalyp, 2 million iýan aiyppul salyndy.
Sinhýa sottalýshynyń sot sheshimine baǵynǵanyn jáne shaǵymdanbaitynyn málimdedi.
Sinhýa aqparat agenttiginiń habarlaýynsha, Men Hongvei qyzmet etken kezde ol óziniń jaǵdaiyn paidalanyp, jalpy somasy 14,46 million iýannan asatyn túrli para jinaǵan.
Eske sala ketsek, Men Hongvei 2016 jyldan 2018 jylǵa deiin Interpoldyń prezidenti bolǵan. 2018 jyldyń qyrkúiek aiynyń sońynda Men Hongvei Interpolǵa tóraǵalyq etý kezinde Frantsiianyń shtab-páterinen Qytaiǵa oralǵannan keiin bailanysyn úzgen.
2018 jylǵy 8 qazanda Qytaidyń Qoǵamdyq qaýipsizdik ministrligi Men Hongveidiń para aldy degen kúdikpen tergeý júrgizilip jatqandyǵy týraly habarlady. 2019 jyly 10 mamyrda onyń ústinen paraqorlyq boiynsha qylmystyq is qozǵaldy. Sottyń alǵashqy otrysy sol jyldyń 20 maýsymynda ótken edi.
