Qazaqstan Elshiliginde Qytaidyń aýdarmashylar qaýymdastyǵynyń aǵa aýdarmashysy, professor Ha Hýanchjanǵa jáne «Qytai jazýshylary» baspa tobynyń bas basqarmasynyń basshysy, tanymal jazýshy Ákbar Májitulyna II dárejeli «Dostyq» ordenderin saltanatty tabys etý rásimi ótti.
Abai Qunanbaiulynyń murasyn nasihattaýǵa sińirgen eńbekteri úshin atalǵan tulǵalardy memlekettik marapatpen nagradtaý týraly Jarlyqqa Qazaqstan Prezidenti Qasym-Jomart Toqaev 2020 jylǵy 4 tamyzda qol qoiǵan bolatyn.
1928 jyly dúniege kelgen Ha Hýanchjan (ádebiettegi laqap aty – Qabai) Abai shyǵarmashylyǵyn zertteýge ómirin arnaǵan alǵashqy sheteldik ádebiettanýshylardyń biri bolyp tabylady. 1958 j. Ha Hýanchjannyń «Abai Qunanbaiuly. Úsh óleń» atty tuńǵysh aýdarmalar jinaǵy jaryq kórdi. Sol jyly QHR ShUAA-da shyǵatyn «Tian-Shan» jýrnaly «Qazaqstannyń uly aqyny - Abai Qunanbaiuly» atty onyń Abai týraly alǵashqy ǵylymi maqalasyn jariialady.
Onyń «Abai óleńderi» jáne «Qara sózder» atty qytai tilindegi aýdarmalaryn Shynjań baspasy 1982 jáne 1984 jj. basyp shyǵardy. Úsh jyldan keiin Beijińde Qabaidyń «Abai jáne onyń poeziiasy» atty maqalalar jinaǵy, al 1994 j. ol qurastyrǵan «Abai shyǵarmalarynyń tolyq jinaǵy» qytai tilinde jaryq kórdi.
Ha Hýanchjannyń eń eleýli eńbekteriniń biri – Muhtar Áýezovtiń álemge áigili «Abai joly» roman-epopeiasynyń aýdarmasy. Bul jumysqa ol 14 jyl jumsaǵan bolatyn.
Ákbar Májituly – Qytai tilinde jazatyn QHR-dyń az ulttar ókilderiniń kórnekti jazýshylarynyń biri. 1982 j. bastap Qytai Jazýshylar odaǵynyń múshesi bolyp tabylady, kezinde QHR Halyqtyq-saiasi konsýltativtik keńesiniń depýtaty bolǵan, QHR memlekettik syilyǵynyń úsh márte iegeri, onnan astam kitaptyń, onyń ishinde Abai shyǵarmalary aýdarmalarynyń avtory.
2020 jyly qyrkúiekte Ákbar Majitulynyń «Abai Qunanbaiulynyń shyǵarmalary qytai tilinde» atty 2 tomdyq jinaǵy jaryq kórdi.
Ákbar Májitulynyń aýdarmalary men izdenisteriniń arqasynda búgin qytai oqyrmandary Abai Qunanbaiulynyń aqyndyq jáne filosofiialyq murasymen qatar qazaq ádebietiniń basqa da kórnekti klassikteriniń shyǵarmalarymen jaqyn tanysýǵa múmkinshilik alýda.
