Qytai qarýlaný boiynsha AQSh pen Resei arasynda jasalatyn jańa kelisimge qosylýdan bas tartty. Mundai kelisim bolatynyn AQSh Prezidenti Donald Tramp málimdegen. Biraq kelisimniń jai-japsary ázirge belgisiz.
BUU-daǵy Qytai elshisi Chjan Tsziýn 2 tamyzda Pekin "Orta jáne qysqa qashyqtyqqa arnalǵan iadrolyq zymyrandardy joiý" kelisimi kúshiniń joiylǵanyna ókinish bildiredi, biraq Qytai Tramp shaqyrdy eken dep qarýlaný boiynsha jańa kelisimge qosylady dep oilamaimyn degen.
2 tamyzda osydan 32 jyl buryn qol qoiylǵan zymyran týraly kelisimniń kúshi joiylǵan edi. Oǵan sáikes, sovet úkimeti men AQSh radiýsy 500-5500 shaqyrym bolatyn ballistikalyq jáne qanatty zymyrandardy qurastyrmaýǵa ózara kelisken edi. Kelisimge sol kezdegi AQSh prezidenti Ronald Reigan men Sovet odaǵynyń jetekshisi Mihail Gorbachev qol qoiyp, 1988 jyly kelisim kúshine engen.
Zymyran týraly kelisim kúshiniń joiylýyna Vashington men Máskeýdiń bir-birin "kelisim-shartty buzdy" dep aiyptaýy sebep bolǵan. Buǵan deiin AQSh pen NATO reseilik 9M729 "Novator" qanatty zymyrany (SSC-8 dep te ataidy) kelisimde kórsetilgen shekten alysqa ushady dep Máskeýdi birneshe ret aiyptaǵan. Resei muny teristep, kelisim sharttaryn AQSh-tyń ózi buzyp otyr dep málimdegen. Vashington bul aiypty joqqa shyǵarǵan.
Sarapshylar bul kelisimniń joiylýy Resei men AQSh arasyndaǵy qarýlaný básekesin kúsheitedi dep qaýiptenedi.
Donald Tramp 2 tamyzda jýrnalisterge iadrolyq qarýdy azaitý maqsatynda Reseimen jańa kelisimge qol qoiǵysy keletinin, oǵan Qytai da qosylǵanyn qup kóretinin aitqan.
