XXIV qysqy Olimpiada oiyndarynda Qytai quramynda synǵa túsip jatqan konkishi qazaq qyzy Aqnár Adaqqyzy kóptegen BAQ-tyń nazaryn aýdarýda, dep habarlaidy QazAqparat.
Aqnár Adaqqyzy 1999 jyly Shyńjań ólkesi, Hýtýbi aýdany, Shitizi qazaq avtonomiialy eldi mekeninde týǵan. Aqnár 5 jasynan bastap konki tebedi. Oǵan alǵashqy konkiin aǵasy syilapty. Dál osy syilyq onyń sporttyq ómiriniń bastamasyna ainalady. 10 jasynda sportqa degen áýestigine kásibi túrde qarap, jattyqtyrýshysynyń baǵyt-baǵdarymen shuǵyldana bastaidy. Kún saiynǵy tynymsyz eńbek pen tabandy jattyǵýlar kóp uzamai nátijesin de kórsetedi. Aqnár Shyńjańdaǵy jasóspirimder arasynan airyqsha kózge túsedi.
Qytaidyń aqparat quraldary Aqnárdiń sporttaǵy ómirlik joly týraly jarysa jazýda. Ol 2012 jyly ákesiniń aýyr syrqatyna bailanysty jattyǵýdy toqtatýǵa májbúr bolypty. Ákesine qaraý úshin biraz ýaqyt úide otyryp qalady. Qyzynyń qabiletin biletin ákesine bul ońai timeidi. Ol qaitys bolar aldynda: «Óziń jaqsy kóretin iske myqtap den qoiýyń kerek jáne bir nársege kirisseń baryńdy sal. Men seniń ulttyq qurama qataryna qosylyp, úzdik sportshy bola alatynyńa senemin...» dep amanat aityp ketken.
Aqnár ákesiniń bul sózderin ómirlik ustanymyna ainaldyryp, úmitin aqtaýdy maqsat tutady. Ýaqyty men kúsh-jigerin sarp etip, 2014 jyly Shyńjań qysqy oiyndarynda qatarynan 5 ret chempion atanady. Sóitip, 15 jasynda resmi túrde Shyńjań quramasynyń músheligine ótip, ulttyq jarysqa qatysý quqyǵyna ie bolady. Al 2016 jyly Qytaidyń ulttyq quramasyna alynady.
2019 jyly ulttyq quramanyń sapynda júrgen Aqnár el ishinde jáne shetelde ótken alamandarda qatarynan 2 altyn, 4 kúmis jáne 1 qola medal jeńip alady. Bul kezde ol áli 20-ǵa da tolmaǵan edi. Al byltyrǵy álem chempionatynda Aqnár konkimen júgirýden komandalyq jarysqa qatysyp, Qytaidyń qorjynyna qola medal salady.
5 aqpanda Beijińdegi qysqy Olimpiada oiyndarynda áielder arasyndaǵy 3000 metrge konkimen júgirý jarysynda Aqnár 4:12.28 ýaqytymen 17-orynǵa ie boldy.
Oiynnan keiin bergen suhbatynda qazaq qyzy budan da joǵary nátijelerden úmitti ekenin, áli de sheberligin shyńdaý úshin aianbai eńbek etetinin jetkizdi.
Aqnár endi 10 aqpan kúni áielder arasyndaǵy 1500 jáne 5000 metrge konkimen júgirý jarysynda da baq synamaq.
Eske salsaq, Beijińdegi XXIV qysqy Olimpiada oiyndarynda Qytai atynan úsh qandasymyz qatysýda.
