Qytaidyń Qazaqstandaǵy elshisi Chjan Siao Shyńjańda qazaqtarǵa qysym jasalyp jatqany týraly habarlardy "jalǵan aqparat" dedi. Bul týraly ol 28 mamyrda Nur-Sultanda ótken qazaq-qytai qatynasyna arnalǵan jiynnyń aldynda aitty.
Jýrnalister Qytai elshisinen "Almatyda turǵyndar birneshe jiyn ótkizip, Qytaidaǵy týysqandaryna qysym jasalǵanyn, olardyń Qazaqstanǵa óte almai otyrǵanyn aitty. Qytaidan Qazaqstanǵa kelip oqyp júrgen qazaq stýdentter keri qaitsaq, qamaidy deidi. Bul aqparat qanshalyqty ras?" dep surady.
Chjan Siao tilshilerdiń suraǵyna "Barlyq aqparat jalǵan. Bul aqparattardy qaidan aldyńyz? Aqparatty qaidan alǵanyńyzdy aita alasyz ba? [Stýdentterdiń aitqany] da teris aqparat. Shyńjańdaǵy jaǵdai birqalypty. Shyńjańdaǵy sharalar - terrorizm jáne ekstremizmmen kúresý áreketi" dedi.
27 mamyrda Almatyda "Qytai zertteý institýty" uiymynyń ofisinde bir top adam baspasóz maslihatyn ótkizip, týystary saiasi lagerden bosaǵanymen Qazaqstanǵa kele almai otyrǵanyn aitqan. Olar Qazaqstan biliginen, halyqaralyq uiymdardan kómek suraǵan.
Shyńjań aimaǵyndaǵy lagerler jaily alǵash ret 2017 jyldyń kókteminde aityla bastaǵan. BUU Shyńjańdaǵy "saiasi tárbieleý ortalyqtarynda" millionǵa jýyq adam "erkinen tys" qamaýda otyrǵanyn málimdegen.
Qazaqstannyń birneshe qalasynda azamattar jinalyp, "Qytaida jaqyndarymyz qysym kórip jatyr, úiqamaqta otyr, Qazaqstanǵa óte almaidy" degen.
Qytai úkimeti basynda bul ortalyqtardyń baryn joqqa shyǵaryp keldi. Keiin Pekin Shyńjańdaǵy saiasatyn "ekstremizmge qarsy shara" dep atap, adamdar erkinen tys otyrǵan lagerlerdi "til úirenip, kásipke baýlityn " ortalyqtar dep túsindirgen.
