Qytaidyń ońtústik-shyǵysyndaǵy Tsziansi provintsiiasynyń biligi jer resýrstaryn saqtaý úshin "tek krematsiia" (máiitti órteý) saiasatyn engizý sharalaryn qolǵa aldy. Qazir jergilikti bilik turǵyndardan daiyn tabyttardy kúshpen tárkilep, jerleý rásimine tyiym salýda.
Provintsiia úkimeti krematsiiany máiitti joiýdyń jalǵyz ruqsat etilgen ádisi etýdi kózdep otyr. Provintsiianyń biraz qalasynda bilik jer resýrstaryn saqtaý úshin "krematsiia" saiasatyn osy jyldyń qyrkúiegine deiin tolyǵymen engizbekshi, dep jazady RIA Novosti.
Ótken demalystarda Qytaidyń áleýmettik jelilerinde taraǵan sýretter men videolarǵa súiensek, sheneýnikter Ganchjoý, Tszian jáne Ichýn okrýgterinde jergilikti aýyl turǵyndarynan tabyttardy kúshpen tartyp alǵan. Taýdai bolyp úiilgen aǵash tabyttardy ekskavatordyń kómegimen joidy, keibir qart turǵyndar tabytty saqtaý úshin ishine jatyp alǵan.
Bilik krematsiia bastamasyn kótergende, tabyttardy satyp alý men olardy daiyndaýǵa tyiym salǵan bolatyn. Al provintsiia biligi jergilikti halyqtyń úilerindegi tabyttardy tárkileýmen ainalysqan edi. Jergilikti turǵynnyń aitýynsha, kedei otbasylar tabyt daiyndaýǵa qajetti 5 myń iýandi uzaq jyldar jinaidy, alaida bilik ótemaqy retinde tek eki myń iýan usynyp otyr. Sheneýnikter tek tabytqa ǵana emes, qulpytastar men qaǵaz aqshaǵa da tyiym salǵan.
