AQSh-tyń Hiýstondaǵy Qytai konsýldyǵyn jabýyna jaýap retinde Qytai AQSh-tan Chendýdegi konsýldyqty jabýdy talap etti. Qytaidyń syrtqy ister ministri 24 shildede AQSh-tyń konsýldyqty basqarý quqyǵy joiylǵanyn habarlady. Ministrlik bul áreketti "AQSh tarabynyń negizsiz áreketine zańdy ári qajetti jaýap" dep atady.
21 shildede AQSh úkimeti 72 saǵat ishinde Qytaidyń Hiýstondaǵy konsýldyǵyn jabý týraly sheshim shyǵarǵannan keiin Vashington men Pekin arasyndaǵy qatynas ýshyǵa túsken. 23 shildede AQSh memlekettik hatshysy Maik Pompeo Amerikanyń áriptesterin Qytai kommýnistik partiiasynyń ǵalamdyq "gegemoniialyq" ekpinine birigip qarsy turýǵa shaqyrdy. Pompeo ondaǵan jyldar boiǵy Pekinmen yntymaqtastyqtan oidaǵydai nátije shyqpaǵanyn, Qytaidyń demokratiiaǵa qarai bet burmaǵanyn aitty.
Buǵan deiin Tehas shtatyndaǵy Qytai konsýldyǵyn jabýǵa bailanysty túsinikteme bergen AQSh memlekettik departamentiniń ókili Morgan Ortagýs "amerikalyq ziiatkerlik menshik pen jeke aqparatty qorǵaý" maqsatynda sondai qadam jasalyp otyrǵanyn aitqan.
