8 dinamo sportshysy Beijińdegi qysqy Olimpiadada Ulttyq quramanyń namysyn qorǵaidy. Bul týraly QR Ishki ister ministrliginiń baspasóz qyzmeti jariialady, dep habarlaidy QazAqparat.
«Ótken aptada ulttyq qurama XXIV Qysqy Olimpiada oiyndaryna qatysý úshin Beijińge ushyp ketti. Qazaqstandyqtar sporttyń 8 túrinen 82 olimpiadalyq litsenziia jeńip alǵan bolatyn. Onyń ishinde biatlon, short-trek, konkimen júgirý jáne taý shańǵysy sporty, fristail-akrobatika jáne taǵy basqa sport túrleri bar. Ulttyq olimpiadalyq komanda quramyna kirgen 32 sportshynyń 28-i - dinamoshylar», - delingen ministrlik habarlamasynda.
Sonymen birge, táýelsizdik jyldary qazaqstandyq sportshylar jeńip alǵan 72 olimpiadalyq medaldyń 60-y «Dinamo» qoǵamynyń ókilderine tiesili.
Aita ketý kerek, ulttyq qurama komandalarynyń 80%-dan astamyn dinamo sportshylary quraidy. Olar ártúrli sport túrleri boiynsha óner kórsetedi. Sondai-aq 44 olimpiadalyq sport túriniń 36-sy «Dinamoda» daiyndalady.
«Dinamo» dene shynyqtyrý-sport qoǵamy – quqyq qorǵaý organdary qyzmetkerleriniń dene shynyqtyrý jáne arnaiy daiarlyǵyna járdemdesetin eldegi eń kóne sport uiymdarynyń biri.
Toqsan myńnan astam quqyq qorǵaý organdarynyń qyzmetkeri - osy qoǵamnyń múshesi. Olar 15 aýmaqtyq filialdaǵy 445 dene shynyqtyrý ujymyna biriktirilgen.
Odan bólek, bul qoǵam - buqaralyq sportty, dene shynyqtyrý-sport qozǵalysyn, jastardy tárbieleý baǵytynda qyzmet atqaratyn biregei sport uiymy.
