23 qazan kúni Qazaqstan Respýblikasynyń Memlekettik hatshysy Qyrymbek Kósherbaev jumys saparymen Túrkistan oblysynda boldy. Onda Abai men Ál-Farabidiń mereitoilyq jyly aiasynda ótken saltanatty is-sharalarǵa qatysyp, óńirdiń ziialy qaýym ókilderimen kezdesti, dep habarlaidy "Ult aqparat" Aqordaǵa silteme jasap.
Memlekettik hatshynyń jumys sapary uly oishyl ál-Farabidiń atamekeni Otyrardan bastaldy. Qyrymbek Kósherbaev bul jerdegi qaita qalpyna keltirý jumystarymen jáne «Ábý Nasyr ál-Farabi rýhaniiaty» atty mýzeidiń qyzmetimen tanysty. Sondai-aq «Arystanbab» kesenesine ziiarat jasap, «Uly babalar alleiasyn» aralap kórdi.
Memlekettik hatshy Abai men ál-Farabi eskertkishteriniń saltanatty ashylý rásimine qatysty. Uly aqyn Abai Qunanbaiulynyń jáne «ekinshi ustaz» Ábý Nasyr ál-Farabidiń eskertkishteriniń ashylýy olardyń urpaqtarynyń kieli Túrkistan topyraǵyna degen qurmeti bolyp tabylady.
Qyrymbek Kósherbaev óziniń quttyqtaý sózinde Elbasy Nursultan Nazarbaevtyń bastamasymen jáne Memleket basshysy Qasym-Jomart Toqaevtyń jan-jaqty qoldaýymen Túrkistan áleýmettik-ekonomikalyq damý turǵysynan tyń serpin alyp, túrki áleminiń mańyzdy rýhani ortalyǵy retinde qarqyndy jańǵyryp kele jatqanyn atap ótti.
Sonymen birge Memlekettik hatshy shyǵarmashylyq ziialy qaýym ókilderimen kezdesip, Oqýshylar saraiy men Shámshi Qaldaiaqov eskertkishiniń saltanatty ashylý rásimine qatysty, sondai-aq «Áziret-Sultan» mýzei-qoryǵyndaǵy Qoja Ahmet Iasaýi kesenesine ziiarat jasady jáne «Aqjaiyq» mýzykalyq mektebinde boldy.
