2021 jylǵy 8 sáýirde QR Memlekettik hatshysy Q.Kósherbaevtyń tóraǵalyǵymen Saiasi qýǵyn-súrgin qurbandaryn tolyq aqtaý jónindegi memlekettik komissiianyń ekinshi otyrysy ótti, dep habarlaidy "Ult aqparat" Aqordaǵa silteme jasap.
Jiyn barysynda Saiasi qýǵyn-súrgin qurbandaryn tolyq aqtaý jónindegi memlekettik komissiia men onyń óńirlik filialdarynyń biylǵy atqarǵan qyzmeti talqylandy.
Memlekettik komissiianyń tóraǵasy Q.Kósherbaev atalǵan komissiianyń jumysyn uiymdastyrý kezeńi aiaqtalyp, elimizdiń túrli arhivterinde ǵalymdardyń jáne sarapshylardyń belsendi zertteý jumystary bastalǵanyn atap ótti.
Komissiianyń qyzmetin qamtamasyz etý úshin arnaiy Jobalyq ofis qurylyp, onyń quramyna ǵalymdar, zertteýshiler jáne memlekettik organdardyń ókilderi kirgen. Sonymen qatar Memlekettik komissiia jumysynyń barlyq baǵytyn tolyq qamtý úshin 11 jumys toby quryldy. Ár top óz qyzmetin qýǵyn-súrgin qurbandarynyń sanatyna sáikes taqyryptyq josparlar men belgili bir ádistemeler aiasynda júzege asyrady.
Memlekettik komissiianyń jumysyn júieli uiymdastyrý úshin elimizdiń barlyq aimaqtarynda saiasi qýǵyn-súrgin qurbandaryn tolyq aqtaý jónindegi óńirlik komissiialar quryldy. Olardy oblystardaǵy ákimderdiń orynbasarlary basqarady jáne quramynda ǵalymdar, kórnekti qoǵam qairatkerleri jáne memlekettik organdar men uiymdardyń ókilderi bar.
Bilim jáne ǵylym ministri A.Aimaǵambetov májilis barysynda jumys toptarynyń barlyq músheleri jabyq jáne arnaiy arhivterde jumys isteýge ruqsat alǵanyn atap ótti. Ǵalymdardyń jalaqysy men barlyq áleýmettik tólemderi saqtala otyryp, joǵary oqý oryndary men ǵylymi-zertteý institýttaryndaǵy negizgi jumystarynan ýaqytsha bosatyldy.
Mádeniet jáne sport ministri A.Raiymqulova Saiasi qýǵyn-súrgin máseleleri jónindegi arnaiy arhiv qoryn jáne Ulttyq jad institýtyn qurý jumystary týraly aitty.
Otyrys barysynda Saiasi qýǵyn-súrgin jónindegi jabyq arhiv qorlaryn jan-jaqty zerdeleý jáne olardy kezeń-kezeńimen qupiiasyzdandyrý úshin shaǵyn komissiia qurý jóninde sheshim qabyldandy.
Jiyn qorytyndysy boiynsha Memlekettik hatshy vedomstvolyq jáne memlekettik arhivterdiń qyzmetin jetildirýge, arhivterdegi ǵalymdar men zertteýshilerdiń jumysy úshin qolaily jaǵdai jasaýǵa baǵyttalǵan birqatar tapsyrma berdi. Óńirlik komissiialardyń qyzmetin jandandyryp, olardyń qyzmetin qarjylandyrý, sondai-aq, Memlekettik komissiia qyzmetiniń aqparattyq strategiiasyn qalyptastyrý mindetteri belgilendi.
