QR Joǵarǵy sotynyń tóraǵasy
Qairat Mámidiń nazaryna!
Qurmetti Qairat ata!
Men - Káýker Janerke Janbolatqyzy 2017 jyldyń 27 aqpanynda dúniege keldim. Men dúniege kelmei turyp, iaǵni ótken 2016 jyldyń tamyz aiynyń 3-i kúni ákem kisi qolynan qaza tapty. Basynan qatty tigen soqqynyń kesirinen ákeshim Ábdikerimov Janbolat Káýkeruly bu dúniemen qoshtasyp kete bardy.
Sheshem qaldy, zar eńirep. Ájem men atam qaldy, qarashańyraqtyń iesi sanalatyn uldarynyń qabirin qushaqtap. Mektep esigin biyl ǵana ashqan ápkem qaldy, ákesiz jetim bolyp. Ákemniń baýyrlary qaldy, «qanǵa-qan, janǵa-jan» dep inileriniń kegin ne qaitararyn, ne qaitarmasyn bilmei... Men ol kezde dúnie esigin áli ashpasam da, anamnyń qursaǵynda jatyp, sol bir aýyrtpalyqtyń bárin tula boiymmen sezinip jattym.
Qairat ata, qazaq jetimin jylatpaǵan el edi ǵoi. Bizdi jylatyp, ákesiz jetimek etken Kerimjan Rústem atty azamat qazir bostandyqta «gólaittap» júr. Meniń ákemniń sonda suraýy bolmaǵany ma? Bireýdiń malyn óltirse de, jazaǵa tartatyn zańymyz bar edi ǵoi. Meniń ákemniń mal ekesh mal sekildi de quny bolmaǵany ma? Osyny oilasam, jan-dúniem titirkenip, tula-boiym qalshyldap ketedi. Dúnie esigin áli ashyp úlgermegen sábidiń júregine jara salý – Táýelsiz, damyǵan, álemdegi 30 eldiń sapyna qosylýǵa talpynǵan memleket úshin uiat emes pe? Bir úili jandy qaiǵynyń teńizine batyrǵan qylmyskerdi bostandyqqa jibere salý búkil qazaq eli azamattarynyń ashýyn týǵyzaryna bek senemin. Sondyqtan da, Sizge hat jazyp, kómek qolyńyzdy sozýyńyzdy ótinip suraimyn.
Qairat ata! Sizdiń men sekildi nemereńiz bar ma? Qudai onyń betin ary qylsyn, sol nemereńiz meniń kúiimdi keship jatsa, tynysh uiyqtar alar ma edińiz?. «Ár qazaq – meniń jalǵyzym» deitin ulttyń uly emes pe edik?!. Demek, men Sizdiń de nemereńizbin. Meniń sózimdi jerge tastai kórmeńizshi.
Ákem Ábdikerimov Janbolat Káýkeruly kisi qolynan qaza tapty. Qaraǵandy oblysyna qarasty Balqash qalalyq soty qylmysty isti qarap, Kerimjan Rústemdi 106 babtyń 3-tarmaǵymen (Densaýlyqqa qasaqana aýyr ziian keltirý) qylmysty dep taýyp, 9 jylǵa bas bostandyǵynan aiyrdy. Kerimjan Rústemniń zańgerleri bul jazamen kelispei, Qaraǵandy oblysynyń sotyna júginedi. Oblystyq sot Balqash qalalyq sottyń úkimin ózgertpei kúshinde qaldyrady. Osylaisha ákemdi óltirgenderdiń qylmystyq isi Joǵarǵy sotqa deiin jetedi. Nege ekenin qaidam, Joǵarǵy sot Kerimjan Rústemniń qylmysyna belgilengen 106 babtyń 3-tarmaǵyn 104-baptyń 1-tarmaǵyna ózgertip (Abaisyzda qazaǵa ushyratý 1. Abaisyzda qazaǵa ushyratý – úsh jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrýǵa jazalanady), sosyn Elbasynyń táýelsizdiktiń 25 jyldyǵyna jariialaǵan Raqymshylyǵyna ilip, sot zalynan bosatyp jiberdi.
Qurmetti Qairat ata! Elbasymyzdyń raqymshylyǵy qylmyskerge buiyryp, bizge buiyrmai ma? Bizdi tóbemizden tas túskendei eseńgiretip tastaǵan bul úkimniń sońy nege aparatynyn ózińiz oilap kórińizshi.
Ájem Kúlzipash Seiitova
Birinshiden, ájemdi aiaimyn. Ákemniń qazasynan keiin densaýlyǵy kúrt nasharlap ketip edi. Joǵarǵy sottyń sheshiminen keiin tipti jaǵdaiy tómendep, óz aiaǵymen júrgen ájem múgedek arbasyna tańylyp qaldy.
Atam Ábdikárimov Káýker
Ekinshiden, atam «balalary (ákemniń baýyrlary) «kek qýamyn» dep bir bálege ushyrap qala ma dep jany shyǵardai shyryldap júr.
Úshinshiden, ákemniń baýyrlary Qazaqstan musylmandar dini basqarmasyna baryp, qazaqy jolmen «qanǵa qan, janǵa jan» dástúrin jańǵyrtýǵa pátýa surady. Múftiiat pátýá berýden úzildi-kesildi bas tartypty. Munyń sońy taǵy da qylmysqa jalǵasyp ketse, kim jaýapty?
Anam Ábdikerimova Ǵaliia Batyrjanqyzy men ákem Ábdikárimov Janbolat Káýkeruly
Tórtinshiden, otyz jasynda azamatynan airylyp, jesir qalǵan sheshem Ábdikárimova Ǵaliia Batyrhanqyzy zań jolymen ádildik tappasa, joǵarǵy sottyń aldyna baryp ózin-ózi órteýi ábden múmkin ǵoi. Mundai jaǵdai bola qalsa, ákemniń isin qaraǵan Joǵarǵy sottyń qyzmetkerleri jaýapty bolmai ma?
Káýker Zere Janbolatqyzy
Besinshiden, mektep tabaldyryǵyn biyl attaǵan Káýker Zere Janbolatqyzy men dúniege jańa kelgen meniń keibir sheneýnikterdiń kesirinen kúshtik qurylymdarǵa degen keri kózqarasymyz qalyptasyp ketse, bul Táýelsiz Qazaqstan úshin eń úlken qaýip emes pe? Bir úili jandy baǵyp otyrǵan ákemniń janynyń keibir sýdialarǵa kók tiyndyq quny joq shyǵar. Biraq, keýdesinde shyryldaǵan jany bar jetimekterdiń kóz jasynyń qunynyń qandai bolatynyn Elbasymyz jaqsy biledi.
Qurmetti Qairat ata!
Ákemniń nurly júzin ómirde bir ret kóre almaǵan meniń taǵdyrymdy eshbir balaǵa Qudai kórsetpese eken. Sol úshin de Elbasynyń halyqqa jasaǵan jaqsylyǵyn, raqymshylyǵyn óz múddelerine paidalanyp, bizdi jylatqandarǵa shara qoldanýyńyzdy suraimyz.
Qazaqstan zańy barlyq adamǵa birdei. Biz ol zańǵa qurmet etemiz. Qurmet etkendikten de, Sizge hat jazyp, kómek surap otyrmyz.
Ákemdi óltirgen adam bostandyqta júrgen kezde Táýelsiz Qazaqstan jerin basyp júrý men úshin óte qorqynyshty, úreili.
Tula-boiymdy bilegen osy úreidi seiiltińizshi, Qairat ata!
Mynaý - menmin!
Sálemnen Káýker Janerke Janbolatqyzy
Abai.kz
