Pedagogtar ústemeaqy alýy úshin jaz ailarynyń ishinde attestattaý rásimin bitirýimiz kerek. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Pedagog mártebesi týraly» zań aiasynda biylǵy qyrkúiek aiynan bastap áriptesterimizge ústemeaqy alý múmkindigi týyp otyr. Ol úshin jaz aiynda testileýdi, jalpy attestattaý rásimin ótkizip alýymyz kerek. Boljam boiynsha 100 myńdaǵan áriptesimiz osy testileýge qatysady dep otyrmyz. Árine, bireýi ótedi, bireýi óte almaidy. Qalai desek te, biz ondai múmkindikti berýimiz kerek. Qyrkúiekten bastap attestattaýdan ótken áriptesterimiz ústemeaqy alýy tiis», - dedi Ashat Aimaǵambetov ministrliktiń Facebook paraqshasynda onlain rejimde ótken apparat jinalysynda.
Sonymen qatar, ministr buǵan deiin balabaqsha, kolledj pedagogteri, direktorlar men olardyń orynbasarlary attestattaýdan ótpegenin jáne ústemaqy almaǵanyn atap ótti.
«Bul másele kópten beri kóterilip keldi. Mysaly, kolledj pedagogtary attestattaýdan ótedi. Biraq, alǵan sanatyna tiisti ústemaqy berilmeitin. Mektep muǵalimderi ústemeaqy alady, al kolledj muǵalimderi almaityn. Balabaqsha boiynsha da osy máseleni áriptesterimiz qansha jyldan beri kóterip keldi. Direktorlar men olardyń orynbasarlary týraly tipti aitýdyń da keregi joq. Olar attestattaýdan ótpeitin jáne ótse de ústemeaqy almaityn. Endi direktor men onyń orynbasarlary attestattaýdan ótip, nátijesinde 30-dan 100 paiyzǵa deiin jalaqysyna qosymsha ústemeaqy alý múmkindigine ie bolady. Balabaqsha, mektep, kolledj pedagogtaryna 30-dan 50 paiyzǵa deiin jalaqysyna qosymsha ústemeaqy alýǵa múmkindik týyp otyr. Bul qańtar aiynan bastap qosylǵan 25 paiyz jalaqyǵa qosymsha tólenedi», - dedi Ashat Aimaǵambetov.
