5-6 qazandaǵy halyq tolqýlary kezinde Qyrǵyzstan parlamentiniń keibir depýtattary Almatyǵa qashyp ketti. Bul týraly Jogorký Keńeshtiń kezekten tys otyrysynda Sadyr Japarov málimdedi. Keńesh 10 qazanda ótken kezekten tys otyrysynda Sadyr Japarovty premer-ministr etip sailaǵan.
Onyń sózinshe, 6 qazanǵa qaraǵan túni bolǵan oqiǵa tóńkeris emes.
"Tóńkeris – bul bilikti basyp alý. Ondaida prezident jáne ózge de legitimdi organdar elden qashady. Bizde bilik halyq tolqýy kezinde aýysty, biraq bul zańdy jolmen boldy. Bar másele parlament depýtattarynyń qashyp ketkeninde" dedi Sadyr Japarov.
Japarovtyń bul sózi jiynǵa qatysqan depýtattardyń shamyna tidi. Olar eskertý jasaǵannan keiin Japarov sózinen jartylai bas tartýǵa májbúr boldy. "Keshirim ótinemin. Men keibir depýtattardyń Almatyǵa qashqanyn estigen edim. Kei adamdardyń aitýynsha, olar áli sonda" dedi ol.
Úkimettiń jańa basshysy parlament otyrysynda sondai-aq Almazbek Atambaevqa oq atý jaily da málimdeme jasady. Onyń sózinshe, Atambaevqa óz kúzetshileri oq atqan.
"Munyń bári stsenarii boiynsha órbidi" dedi Sadyr Japarov oq atýdyń ózine jala jabý úshin uiymdastyrylǵanyn aityp.
Parlament otyrysynan bir kún buryn Bishkekte túrli saiasi kúshterdiń mitingteri ótti. Eski alańda Sadyr Japarovtyń jaqtastary jinalsa, "Ala-Too" alańynda premer-ministrlikke Omýrbek Babanovty usynǵan partiialar men eldiń burynǵy prezidenti Almazbek Atambaevtyń jaqtastary keldi.
Japarov saiasi qarsylastaryn qýdalamaitynyn aitty.
"Saiasi sebep boiynsha eshkim qýdalanbaidy. Men bul qyzmetke oryntaqty qushaqtaý úshin kelgen joqpyn. Eger olardyń jemqorlyqqa qatysy bolsa, bul – bólek áńgime. Jastardyń ǵana emes búkil halyqtyń senimin aqtaýǵa tyrysamyn" dedi Sadyr Japarov.
Qyrǵyzstanda 4 qazan kúni parlament sailaýy ótip, bilikke jaqyn degen partiialar jeńimpaz atanǵan soń, sailaý burmalandy degen halyq narazylyqqa shyqty. Narazylyq aktsiialary kezinde demonstranttar prezident ákimshiligi men parlament depýtattary otyratyn "Aq úi" rezidentsiiasyn basyp aldy. El prezidenti Jeenbekov rezidentsiiadan tastap ketti.
Tolqý saldarynan ortalyq sailaý komissiiasy sailaý nátijesin jaramsyz dep tapty. Oppozitsiia otstavka ketýin talap etip otyrǵan Sooronbai Jeenbekov úkimetti taratý týraly jarlyqqa qol qoiyp, Bishkekte tótenshe jaǵdai jariialady.
Munyń aldynda Jeenbekov elde jańa úkimet quramy jasaqtalǵan soń otstavkaǵa ketýge daiyn ekenin málimdegen. Jańa premer-ministr "Jeenbekovtiń ketýge daiyn" ekenin rastady.
