Qyrǵyzstannyń burynǵy prezidenti Sooronbai Jeenbekov eline oraldy. Bul aqparatty 15 aqpan kúni Azattyq radiosy Qyrǵyz qyzmetiniń derekkózderi rastady.
Aqpannyń basynda áleýmettik jelide Jeenbekov shetelge "qashyp ketti" degen qaýeset taraǵan. 2 aqpan kúni Jeenbekovtiń baspasóz hatshysy Tolgonai Stamalieva eks-prezidenttiń Saýd Arabiia koroliniń shaqyrýymen Mekkege qajylyqqa ketkenin, 10 kúnnen soń oralatynyn málimdegen.
Sol kúni Qyrǵyzstan bas prokýratýrasy ulttyq qaýipsizdik jónindegi memlekettik komitet pen ishki ister ministrliginen Sooronbai Jeenbekovti 2020 jylǵy qazandaǵy oqiǵaǵa bailanysty jaýapqa tartýdy suraǵan. Ashyq aqparatqa qaraǵanda, mundai shaǵymdy "Qyrǵyz úmiti" qozǵalysy túsirgen. Qozǵalys Jeenbekovti parlament sailaýynan keiingi mitingini janshýǵa tapsyrys berdi dep aiyptap, eks-prezident mártebesinen aiyrýdy talap etken.
Jeenbekovtiń Mekkege ketkeni belgili bolǵan soń, "endi ol Qyrǵyzstanǵa oralmaidy degen" taǵy bir qaýeset tarady. Biraq bul qaýesetti taratýshylar oralmaý sebebi retinde "Qyrǵyz úmiti" qozǵalysynyń shaǵymyn emes, burynǵy vitse-premer Dýishenbek Zilalievtiń isin ataǵan.
Qańtardyń sońynda Jeenbekovtiń Zilaliev isi boiynsha kýá retinde sotqa shaqyrylǵany málim boldy. Zilaliev 2018 jyly jeltoqsanda "zańsyz baiydy" degen kúdikpen ustalyp, quzyrly organdar kúdiktiniń úiinen jáne bank jáshiginen aqsha tárkilegen.
Zilalievtiń advokaty Talaigýl Toktakýnovanyń aitýyna qaraǵanda, tergeý kezinde eks-vitse-premer tárkilengen aqshanyń Sooronbai Jeenbekovtiń sailaý naýqanyna arnalǵanyn aitqan.
Prezidenttikke 2017 jyly kelgen Sooronbai Jeenbekov byltyr qazan aiynda parlament sailaýynan keiingi saiasi daǵdarys saldarynan otstavkaǵa ketken.
