Bishkek qalasy Pervomaiskii aýdandyq soty Qyrǵyzstannyń eks-prezidenti Almazbek Atambaevty 11 jyl 2 aiǵa sottap, dúnie-múlkin tárkileý týraly úkim shyǵardy.
Atambaevqa sot úkimi "qylmystyq top jetekshisi Aziz Batýkaevty zańsyz bosatý isi" boiynsha shyqty.
16 maýsymdaǵy sot otyrysynda prokýrorlar Atambaevty 15 jylǵa sottaýdy suraǵan. Sot otyrysy jabyq rejimde ótti.
Sot úkimine sai, Atambaev "Danaker", ekinshi dárejeli "Manas", "Danq", prezidentke beriletin saǵattan aiyrmaq. Sot Atambaevtyń óziniń jáne jaqyndarynyń múlkin tárkileýge úkim shyǵardy. Tárkilenýi tiis múlikterdiń arasynda bes kólik, Shý men Ystyqkól oblysyndaǵy úiler men jer ýchaskeleri – barlyǵy 10 obekt bar.
Atambaevtyń ieligindegi "Media Forým", "Forým", "Avtomash-Energo", "Aprel TV" kompaniialary da tárkilenbek.
Sot úkimi áli kúshine engen joq, aiyptalýshynyń apelliatsiialyq shaǵym túsirýge quqyǵy bar.
Ulty sheshen, Qyrǵyzstan týmasy Aziz Batýkaev 2006 jyly 16,8 jylǵa sottalǵan. Oǵan "adam óltirýge qatysty; zańsyz jolmen qarý daiyndap, satty; jappai bassyzdyqtar uiymdastyrdy" dep aiyptalǵan. Ol 2021 jyly túrmeden shyǵýy tiis edi.
Batýkaev 2013 jyly Naryndaǵy túrmeden "densaýlyǵyna bailanysty" merziminen buryn bosatylǵan. Dárigerlerdiń bergen anyqtamasynda onyń "aýyr syrqatqa ushyraǵany" jazylǵan. Sol kezde ol Bishkektiń halyqaralyq áýejaiyna jetkizilip, Groznyiǵa ushyp ketken. Keiin Qyrǵyzstannyń quzyrly organdary "Batýkaev densaýlyǵyna qatysty anyqtamany ótirik jasatyp aldy, ony bosatýǵa biliktegiler at salysty" dep málimdegen. 2019 jyly Qyrǵyzstan IIM Batýkaev isin qaita tergegen.
Atambaevqa budan bólek Koi-Tashtaǵy oqiǵaǵa qatysty "Adam óltirý", "Kepilge alý", "Buzaqylyq", "Bilik ókiline kúsh qoldaný" syndy baptarmen de qylmystyq is qozǵalǵan.
2019 jyly 7-8 tamyzda Shý oblysy Alamýdýn aýdanyndaǵy Koi-Tash aýylynda "Almazbek Atambaevty tergeýge májbúrlep jetkizý" operatsiiasy kezinde kúshtik qurylymdar men saiasatker jaqtastary arasynda qaqtyǵys bolǵan. Aýyr jaralanǵan arnaiy jasaq ókili kóz jumdy, birneshe adam zardap shekti. 200-den astam adam jaralandy. 8 tamyzda Almazbek Atambaev pen jaqtastary bilikke óz erkimen berilgen. Ol sodan beri qamaýda otyr.
