31 mamyrda Qyrǵyzstan ulttyq qaýipsizdik memlekettik komiteti (UQMK) burynǵy premer-ministr Ómirbek Babanovtyń ustalǵanyn habarlady. Komitettiń baspasóz qyzmetiniń málimetinshe, ol "Qumtór" altyn kenishine qatysty jobany júzege asyrý kezindegi jemqorlyq faktisi boiynsha ustalǵan.
Istiń jai-japsary habarlanbady. Komitet "Qumtór" jobasyn júzege asyrý kezindegi jemqorlyq faktisi boiynsha tergeý jalǵasyp jatqanyn, Babanov tergeý kezinde anyqtalǵan dálelder negizinde ustalǵanyn aitady.
17 mamyrda Jogorký Kenesh otyrysynda UQMK tóraǵasy Qamshybek Tashiev "Qumtórge" bailanysty tórt qylmystyq is tergelip jatqanyn aitqan. Sózinshe, bir iste burynǵy premer Mýhammedkalyi Abylgaziev kúdikti. Ol 2021 jyly qańtarda ustalǵan.
Tashievtiń aitýynsha, "Qumtór" jobasy boiynsha isterde "kóptegen sheneýnik, ministr jáne depýtattar" kúdikti retinde tanylǵan, taǵy bir eks-premer Temir Sariev te osy is boiynsha tergeýge kýáger retinde shaqyrylǵan.
"Respýblika" partiiasynyń qurýshysy jáne eks-lideri Babanov 2011-2012 jyldary Qyrǵyzstan premeri bolǵan. 2017 jyly prezident sailaýyna qatysyp, ekinshi oryn alǵan. Sailaýdan soń ol saiasi karerasyn aiaqtaitynyn aityp, Máskeýge ketken edi. 2019 jyly tamyzda ol Qyrǵyzstanǵa oralǵan.
Babanov Qyrǵyzstanǵa kelgen soń UQMK men qarjy politsiiasyna birneshe ret tergeýge shaqyrylǵan. 2020 jyly 29 tamyzda kezekti tergeýden keiin ol Azattyqtyń Qyrǵyz qyzmetine "segiz qylmystyq is boiynsha jaýap berip jatqanyn" aitqan. Biyl naýryzda UQMK Babanovqa qatysty qozǵalǵan is toqtatqanyn, ol memleketke qoldaý retinde 100 mln som aýdarǵanyn málimdegen.
