Biyl Qyrǵyzstannan elimizge málimdelmegen taýarlar ákelý faktisi ulǵaiyp ketken. Bul jaiynda QR QM Memlekettik kirister komitetinen málim etti, dep habarlaidy QazAqparat.
«Osy jyldyń basynan beri Qyrǵyzstannan Qazaqstan men Reseige halyq tutynatyn taýarlardyń júk aǵyny 3 esege ulǵaiýy baiqalady. Júk aǵynynyń ulǵaiýymen qatar málimdelmegen, iaǵni jasyryn, negizinen Qytai óndirisiniń taýarlary sany edáýir ulǵaidy. Kórsetilgen faktilerdiń aldyn alý maqsatynda memlekettik kirister organdary táýekelderdi basqarý júiesin qoldanady. Onyń negizinde taqyryptyq salyqtyq tekserýler júrgiziledi», - dep atap ótedi komitetten.
Mysaly, vedomstvo dereginshe, 2022 jylǵy 3 aqpanda taqyryptyq salyqtyq tekserý júrgizý barysynda Qyrǵyz Respýblikasynyń júk avtokólik quralynda 3,6 myńnan astam málimdelmegen qymbat jáne salyq salynatyn taýarlar anyqtaldy. Onyń ishinde qytai óndirisiniń qujattary men tańbalary joq 98 birlik teri buiymdary (tondar) tabyldy.
«Taýarǵa ilespe qujattarda tondardyń málimdelmeýi EAEO elderinde mindetti túrde teri buiymdaryn tańbalaýdyń engizilýine bailanysty dep boljanýda. Sondai-aq tekserý júrgizý barysynda taýarǵa ilespe qujattarda kórsetilmegen tanymal brend taýarlary anyqtaldy. Osy faktiler boiynsha materialdar tiisti is-sharalar qabyldaý úshin quqyq qorǵaý organdaryna jiberiledi. Atalǵan taýarlardy EAEO aýmaǵynda ótkizýdiń zańdylyǵyn belgileý maqsatynda Qyrǵyz Respýblikasynyń quzyretti organdaryna suraý salynady. Biznes sýbektileri tarapynan mundai áreketter EAEO boiynsha áriptes elderdiń biýdjetterine zalal keltiretinin atap ótken jón. Osyǵan bailanysty baqylaý kúsheitiletin bolady», - delingen taratylǵan aqparatta.
