Qyrǵyzstanda áleýmettik jeli paidalanýshylary «#My protiv tretei revoliýtsii» heshtegimen jurtshylyqty mitingke shyqpaýǵa shaqyryp jatyr. Bul týraly QazAqparat Kabar agenttigine silteme jasap habarlaidy.
Instagram-nyń ózinde eldegi tolqýlardy toqtatyp, beibit ómir súrýge shaqyrǵan 500-den astam jazba jariialandy. Olardyń avtorlary arandatýǵa berilmeýge, áldekimniń jaǵyna shyǵyp, jik-jikke bólinbeýge úndeýde.
Eske sala keteiik, keshe keshkisin burynǵy prezident Almazbek Atambaevtyń úiinde kúsh qurylymdary men eks-prezidenttiń jaqtastary arasynda qaqtyǵys boldy. Sonyń saldarynan 22 jastaǵy arnaiy jasaq ókili qaza taýyp, 40-tan astam adam jaralanǵan.
Zardap shekkenderdiń arasynda Shý oblysy Ishki ister bas basqarmasynyń bastyǵy Samat Qurmanqulov ta bar. Qazir dárigerler onyń ómirin saqtap qalýdyń qamynda.
Aita ketsek, buǵan deiin Jogorký Kenesh eldiń eks-prezidentinen qol suqpaýshylyq mártebesin alyp tastaý týraly sheshim qabyldaǵan bolatyn. Atambaevqa qatysty depýtattar tarapynan taǵylǵan aiyptardy zertteý boiynsha arnaiy depýtattyq komissiia quryldy. Komissiia jumysynyń nátijesinde oǵan 6 epizod boiynsha aiyp taǵý sheshimi qabyldandy. Alaida Bas prokýratýra komissiianyń jumysyn zań turǵysynan baǵalai kele, tek bes epizodty qaldyrdy.
