Qyrǵyzstanda bolǵan joiqyn selden qaza tapqandar ishinde qazaqstandyq eki bala bary anyqtaldy. Sondai-aq taǵy eki bala joǵalyp ketken, dep habarlaidy "Ult aqparat" Qazaqstannyń Syrtqy ister ministrligine silteme jasap.
"28 maýsymda Qyrǵyzstanda nóser jaýyn-shashyn bolýyna bailanysty Osh oblysynyń Nookat aýdanynda joiqyn sel tasqyny ótip, onyń saldarynan turǵyndar men týrister arasynda zardap shekkender bar. Qyrǵyzstannyń Tótenshe jaǵdai ministrliginiń aldyn ala bergen aqparaty boiynsha, qaza tapqandardyń arasynda Qazaqstannyń kámeletke tolmaǵan azamattary bar. Qazirgi tańda eki balanyń denesi tabylyp, taǵy ekeýin izdeý jumystary jalǵasyp jatyr", - delingen habarda.
Tabiǵi apat ornynda qyrǵyz tarapynyń qutqarý qyzmetteri jumys istep jatqany aitylady.
"Qazaqstandyq diplomattar jergilikti bilikpen turaqty bailanysta. Bizdiń Qyrǵyzstandaǵy Elshiligimiz qaitys bolǵan balalardyń týystaryna barlyq qajetti kómek kórsetip jatyr. Bul qaiǵyly oqiǵa QR Syrtqy ister ministrliginiń erekshe baqylaýynda. Osyǵan bailanysty Qazaqstan Syrtqy ister ministri Murat Nurtileý Qyrǵyzstan SIM basshysy Jeenbek Kýlýbaevpen telefon arqyly sóilesip, tótenshe jaǵdaidyń mán-jaiyn jáne eki eldiń tiisti memlekettik organdarynyń ózara is-qimylyn talqylady", - delingen SIM habarynda.
Qyrǵyz prezidenti Sadyr Japarov Batken, Osh jáne Jalal-Abad oblystarynda júrgen seldiń saldarynan qaza tapqandardyń týystaryna kóńil aitqany habarlandy.
"Seldiń saldarynan adam shyǵyny týraly habardy aýyr qabyldadyq. Mundai oqiǵalar qaitalanbaýy úshin Qudaiǵa duǵa eteiik", - dedi kórshi eldiń basshysy.
Ol sondai-aq beiindi ministrlik pen jergilikti bilik alǵashqy minýttardan bastap barynsha kúsh salǵanyn aitty, dep habarlady 24.kg.
Aita keteiik, buǵan deiin Qyrǵyzstannyń Noqatynda joiqyn sel bolyp, bes adam qaza tapqany habarlanǵan.
