Qyrǵyzstanda taýdan qulaǵan tas kóshkinniń astynda qalǵan Qazaqstan azamattary qutqarylýda. Bul týraly QR Syrtqy ister ministrliginiń baspasóz qyzmetinde málim etti, dep habarlaidy QazAqparat tilshisi.
«Búgin Qyrǵyz Respýblikasynyń astanasy Bishkek qalasynan 40 shaqyrym jerde ornalasqan Skriabin muzdyǵynyń aýmaǵynda bir top týrist tas kóshkininiń astynda qalyp qoidy. Japa shekkenderdiń arasynda Qazaqstannyń tórt azamaty bar. Bastapqy boljam boiynsha, bir adam qaza tapqan. Oqiǵanyń mán-jaiyn anyqtaý ústindemiz», - dedi QR SIM ókili.
Ministrlikten málim etilgendei, qazaqstandyq konsýldyń kómegimen bizdiń eldiń azamattaryn qutqarýǵa QR IIM Tótenshe jaǵdailar komitetiniń qutqarýshylary jumyldyrylǵan.
«Zardap shekken týristerdi evakýatsiialaý úshin Qazaqstannan tikushaq jiberý máselesin qarastyryp jatyrmyz. Saiahatshylardyń arasynda Resei azamattary da bar», - dedi QR SIM baspasóz qyzmetindegiler.
